અભિનેતા રણવીર તમિલ ફિલ્મ અન્નિયનની હિન્દી રિમેક કરશે
મુંબઈ: બોલિવુડ એક્ટર રણવીર સિંહ દર્શકોને મનોરંજનનો મોટો ડોઝ આપવા માટે તૈયાર છે. બોલિવુડના ફિલ્મમેકર્સ સાથે ધમાલ મચાવ્યા બાદ હવે રણવીર સાઉથના જાણીતા ફિલ્મમેકર શંકર સાથે કામ કરવા જઈ રહ્યો છે. શંકરની બ્લોકબસ્ટર ફિલ્મ અન્નિયનની હિન્દી રિમેકમાં રણવીર જાેવા મળશે. આ ફિલ્મની હિન્દી રિમેક ખૂબ મોટાપાયે બનશે અને ૨૦૨૨ના મધ્યમાં શૂટિંગ શરૂ થઈ શકે છે. આ ફિલ્મનું હિન્દી નામ હજી સુધી જાહેર કરવામાં આવ્યું નથી. ઉલ્લેખનીય છે કે, અન્નિયન સાઈકોલોજીકલ એક્શન થ્રિલર ફિલ્મ છે
જે ૨૦૦૫માં રિલીઝ થઈ હતી. રણવીર સિંહે પોતાના સોશિયલ મીડિયા અકાઉન્ટ પર શંકર સાથેની તસવીર શેર કરતાં લખ્યું, ખૂબ જ ગર્વ અનુભવતા જાહેરાત કરું છું કે ભારતીય સિનેમાના દૂરદર્શી અને શ્રેષ્ઠ ક્રાફ્ટમેન શંકર સાથે કામ કરવા જઈ રહ્યો છું.
આ ફિલ્મને પીઢ ફિલ્મ પ્રોડ્યુસર ડૉ. જયંતીલાલ ગડા પ્રોડ્યુસ કરશે. શંકર સાથે કામ કરવા ઉત્સાહિત જણાતા રણવીર સિંહે એક નિવેદનમાં કહ્યું, શંકર સરના અદ્ભૂત સિનેમેટિક વિઝન હેઠળ કામ કરવાનો મોકો મળ્યો તે બદલ હું પોતાને નસીબદાર માનું છું.
તેમણે સાબિત કરી દીધું છે કે, પોતાના વિઝનને સ્ક્રીન પર ઉતારવું અશક્ય નથી. મેં હંમેશા આશા રાખી હતી અને સપનું સેવ્યું હતું કે તેમની સાથે કામ કરવાની તક મળશે. મારા મનમાં તીવ્ર લાગણી છે કે અમે સાથે મળીને પડદા પર જાદુ કરીશું. અન્નિયન જેવી ફિલ્મમાં લીડ રોલ કરવો કોઈપણ આર્ટિસ્ટનું સપનું હોય છે. આપણા દેશના ઉત્તમ ટેલેન્ટ પૈકીના અને જેમની હું દિલથી પ્રશંસા કરું છું તેવા વિક્રમ સરે આ ફિલ્મમાં અદ્ભૂત કામ કર્યું હતું, જેને કદાચ હું સ્પર્શી પણ નહીં શકું.
હું આશા રાખીશ કે ફિલ્મમાં મારા દ્વારા ભજવાયેલા રોલ અને મારી સમજને દર્શકો પસંદ કરે. નિશંકપણે આ જીવનમાં એકવાર કરવા મળતું પર્ફોર્મન્સ છે અને હું આ રોલ કરવામાં મારો જીવ રેડી દઈશ. શંકર સર જીનીયસ ફિલ્મમેકર છે અને દૂરદર્શી છે. હું આ ફિલ્મ કરવા માટે કેટલો ઉત્સુક છું તે શબ્દો દ્વારા નહીં વર્ણવી શકું.
