રાજસ્થાન રોયલ્સને હરાવી ગુજરાત ટાઈટન્સ ટોચ પર
નવી દિલ્હી, સુકાની હાર્દિક પંડ્યાની ઝંઝાવાતી અડધી સદી બાદ બોલર્સે કરેલા શાનદાર પ્રદર્શનની મદદથી ગુજરાત ટાઈટન્સે આઈપીએલ ટી૨૦ ક્રિકેટ ટુર્નામેન્ટની ૧૫મી સિઝનમાં માં ગુરૂવારે રમાયેલી મેચમાં રાજસ્થાન રોયલ્સ સામે ૩૭ રને ધમાકેદાર વિજય નોંધાવ્યો હતો.
પાંચ મેચમાં ગુજરાતનો આ ચોથો વિજય છે. રાજસ્થાન રોયલ્સે ટોસ જીતીને ગુજરાત ટાઈટન્સને પ્રથમ બેટિંગને આમંત્રણ આપ્યું હતું.
ગુજરાતે હાર્દિક પંડ્યાની તાબડતોબ અણનમ ૮૭ રનની ઈનિંગ્સની મદદથી નિર્ધારીત ૨૦ ઓવરમાં ચાર વિકેટે ૧૯૨ રનનો સ્કોર નોંધાવ્યો હતો. જેના જવાબમાં રાજસ્થાન રોયલ્સ ટીમ ૨૦ ઓવરમાં નવ વિકેટે ૧૫૫ રન નોંધાવી શકી હતી.
આ વિજય સાથે ગુજરાત ટાઈટન્સની ટીમ પાંચ મેચમાં આઠ પોઈન્ટ સાથે પોઈન્ટ ટેબલમાં ટોચના સ્થાને પહોંચી ગઈ છે. જ્યારે રાજસ્થાન રોયલ્સ ત્રીજા ક્રમે છે. ૧૯૩ રનના લક્ષ્યાંકને પાર પાડવા મેદાનમાં ઉતરેલી રાજસ્થાન રોયલ્સની બેટિંગ નિરાશાજનક રહી હતી.
ઓપનર જાેસ બટલરે તાબડતોબ બેટિંગ કરી હતી પરંતુ તેને સામે છેડે યોગ્ય સાથ મળ્યો ન હતો. સામે છેડે એક પછી એક વિકેટો પડી રહી હતી. ટોચના પાંચ બેટરમાંથી ફક્ત ઓપનર જાેસ બટલર પ્રભાવશાળી બેટિંગ દાખવી શક્યો હતો.
તેણે ૨૪ બોલમાં આઠ ચોગ્ગા અને ત્રણ સિક્સરની મદદથી ૫૪ રન ફટકાર્યા હતા. જ્યારે તેનો સાથી ઓપનર દેવદત્ત પડિક્કલ ખાતું પણ ખોલાવી શક્યો ન હતો.
બેટિંગમાં ઉપરના ક્રમે પ્રમોટ કરવામાં આવેલો રવિચંદ્રન અશ્વિન પણ કંઈ કમાલ કરી શક્યો ન હતો. તે આઠ બોલમાં આઠ રન નોંધાવીને આઉટ થયો હતો.
જ્યારે સુકાની સંજૂ સેમસને ૧૧ રનનું યોગદાન આપ્યું હતું અને રેસી વાન ડેર ડુસ્સેન છ રન નોંધાવીને પેવેલિયન ભેગો થયો હતો. શિમરોન હેતમાયરે પણ આક્રમક બેટિંગ કરી હતી પરંતુ તેના પ્રયાસો ટીમ માટે પૂરતા ન હતા.
તેણે ૧૭ બોલમાં ૨૯ રન નોંધાવ્યા હતા જેમાં બે ચોગ્ગા અને એક સિક્સર સામેલ હતી. જ્યારે રિયાન પરાગ ૧૮ રન નોંધાવીને આઉટ થયો હતો. ગુજરાત માટે યશ દયાલ અને લોકી ફર્ગ્યુસને ત્રણ-ત્રણ વિકેટ ઝડપી હતી.
જ્યારે મોહમ્મદ શમી અને હાર્દિક પંડ્યાને એક સફળતા મળી હતી. રાજસ્થાન રોયલ્સે પ્રથમ બેટિંગનું આમંત્રણ આપ્યા બાદ ગુજરાતની ટીમે ખાસ કરીને સુકાની હાર્દિક પંડ્યાએ તોફાની અંદાજમાં બેટિંગ કરી હતી.
ટીમની શરૂઆત સારી રહી ન હતી. મેથ્યુ વેડ, શુભમન ગિલ અને વિજય શંકરની બેટિંગ નિરાશાજનક રહી હતી. વેડ અને ગિલની ઓપનિંગ જાેડી અપેક્ષા પ્રમાણે શરૂઆત અપાવી શકી ન હતી. મેથ્યુ વેડ ૧૨ રન નોંધાવીને આઉટ થયો હતો જ્યારે ગિલ પણ ૧૩ રન નોંધાવીને રિયાન પરાગનો શિકાર બન્યો હતો. જ્યારે વિજય શંકર ફક્ત ત્રણ રન જ નોંધાવી શક્યો હતો.SSS
