વિકાસ દુબેના શરીરમાંથી ૩ ગોળી આરપાર નીકળી હતીઃ પીએમ રીપોર્ટમાં ખુલાસો
એન્કાઉન્ટરમાં દુબેને એક ગોળી જમણા ખભા પર, બે ડાબી છાતીએ વાગી હતી, ગોળીથી કોણી ફાટી ગઈ હતી
કાનપુર, એન્કાઉન્ટરમાં ઠાર કરાયેલા ગેંગસ્ટર વિકાસ દુબેનો પોસ્ટમોર્ટમનો રિપોર્ટ આવી ગયો છે. પોસ્ટમોર્ટમ રિપોર્ટમાં કેટલાક ખુલાસાઓ થયા છે. વિકાસના શરીરમાંથી ત્રણ ગોળીઓ આરપાર નિકળી ગઈ હતી તેમજ શરીરમાં કુલ ૧૦ જેટલા ઈજાના નિશાન મળ્યા છે. જેમાંથી છ નિશાન ગોળી વાગવાના છે જ્યારે અને પાંચ નિશાન શરીરના જમણા ભાગમાં છે. આ નિશાન ગોળી વાગ્યા બાદ પડી જવાના કારણે પહોંચ્યા છે.
પોસ્ટમોર્ટમના રિપોર્ટ અનુસાર, એક ગોળી જમણા ખભા પર અને બાકીની ગોળીઓ ડાબી બાજુની છાતી પર વાગી હતી. આ ઉપરાંત જમણા ભાગમાં માથા, કોણી, ફેફસા અને પેટના ભાગમાં પણ ગોળી વાગી હતી. ફોરન્સિક એક્સપર્ટના જણાવ્યા અનુસાર પહેલી ગોળી વિકાસના ખભા પર વાગી હતી. અન્ય બે ગોળીઓ તેની છાતી પર વાગી હતી અને કોણી પર ગોળી વાગવાના કારણે કોણી ફાટી ગઈ હતી. તેમજ તેના માથા પર હળવી ઈજા તેમજ સોજો આવેલો હતો.
વિકાસ દુબેના પેટના અને ફેફસાના ભાગમાં ઉંડા ઘા તેમજ સોજો હતો. એસટીએફે એન્કાઉન્ટર પર દાવો કર્યો હતો કે વિકાસે તેમના પર પહેલા ગોળી ચલાવી હતી તેના કારણે તેઓએ જવાબી કાર્યવાહીમાં તેના પર ગોળીબાર કરવો પડ્યો હતો. પ્રાથમિક તપાસમાં તેને ચાર ગોળી વાગ્યાની વાત બહાર આવી હતી. જેમાંતી ત્રણગોળી તેની છાતીમાં વાગી હતી પરંતુ પોસ્ટમોર્ટમના રિપોર્ટમાં છાતીમાં બે ગોળીજ વાગી હોવાનો ખુલાસો થયો છે.
પોસ્ટપોર્ટમ રિપોર્ટના ડાયાગ્રામમાં જોઈ શકાય છે કે ચાર, બે અને ત્રણ સ્પોટ પર વિકાસને ગોળી વાગી છે જ્યારે પાંચ, છ, સાત સ્પોટ પર ગોળી શરીરની આરપાર નિકળી ગઈ છે. શરીર પરથી મળી આવેલા કુલ ૧૦ ઈજાના નિશાનમાંથી ત્રણ ગોળીઓ શરીરને વિંધીને આરપાર નિકળી ગઈ હોવાનો પોસ્ટમોર્ટમ રિપોર્ટમાં ખુલાસો થયો છે.
