અભિનેત્રી નરગિસ ફખરી અમેરિકન શેફને ડેટ કરે છે
મુંબઈ: એક નહીં બે-બે વખત પ્રેમમાં ઠોકર ખાનારી બોલિવુડ એક્ટ્રેસ નરગિસ ફખરી ફરી એકવાર પ્રેમમાં પડી છે. તે અમેરિકન શેફ જસ્ટીન સેન્ટોસને ડેટ કરી રહી છે. ફિલ્મમેકર મેટ અલોંઝોથી અલગ થયા બાદ નગરિસ માટે આ તેની લવ લાઈફની નવી શરુઆત છે. જસ્ટિન મૂળ ન્યૂયોર્કનો છે જ્યારે નરગિસ કેલિફોર્નિયાની છે. હાલ, નરગિસ અને જસ્ટીન અમેરિકામાં એકબીજા સાથે ક્વોલિટી ટાઈમ સ્પેન્ડ કરી રહ્યા છે.
જેની તસવીરો બંનેએ પોતાના સોશિયલ મીડિયા અકાઉન્ટ પર શેર કરી છે. નરગિસના જીવનમાં ફરીથી પ્રેમનું આગમન થતાં તેની ફ્રેન્ડ્સ અને એક્ટ્રેસ ઈલિયાના અને લિઝા હેડન તેના માટે ખુશ છે. ઉલ્લેખનીય છે કે, નરગિસ ઉદય ચોપરા સાથે પણ રિલેશનશિપમાં રહી ચૂકી છે.
તેઓ લાંબા સમય સુધી રિલેશનમાં રહ્યા હતા. કેટલાક રિપોર્ટ્સમાં તો તેઓ લિવ-ઈનમાં રહ્યા હોવાનું પણ કહેવાયું છે. બંને વચ્ચે કોઈ ખટરાગ થતાં તેમણે અલગ થવાનો ર્નિણય લીધો હતો. આ બંને લગ્ન કરવાના હોવાની વાત પણ એક સમયે ચર્ચાઈ હતી.
જો કે, તેમના બ્રેકઅપે આ વાત પણ પૂર્ણ વિરામ મૂકી દીધું હતું. બ્રેકઅપથી ભાંગી પડેલી નરગિસ બાદમાં અમેરિકા જતી રહી હતી. બાદમાં તેની લાઈફમાં હોલિવુડ ફિલ્મમેકર મેટ અલોંઝોની એન્ટ્રી થઈ હતી. જો કે, બંને વચ્ચેના સંબંધો લાંબા સમય ટક્યા નહીં અને બ્રેકઅપ કરી દીધું.
નરગિસે ઈન્ટાગ્રામ પર મેટ સાથેની તસવીરો પણ શેર કરી હતી, જે તેણે બ્રેકઅપ બાદ ડિલિટ કરી દીધી હતી. સાથે જ તેને અનફોલો પણ કરી દીધો હતો. નરગિસના વર્ક ફ્રંટની વાત કરીએ તો તે છેલ્લે હોરર ફિલ્મ અમાવસમાં જોવા મળી હતી. ફિલ્મ ગયા વર્ષે રિલીઝ થઈ હતી. જે બોક્સઓફિસ પર ઉંધા માથે પછડાઈ હતી. નરગિસ હવે તોરબાઝમાં જોવા મળશે. જેમાં તેની સાથે રાજુ ચઢ્ઢા, રાહુલ મિત્રા, પુનીત સિંહ, ગિરિશ મલિક અને સંજય દત્ત જોવા મળશે.