તને બધાનાં સ્વભાવમાં નેગેટીવ પોઈન્ટ જ દેખાય છે!
Image of young psychiatrist comforting her sad patient
પંકિતા જી. શાહ
જવા દે યાર! એ બરાબર નથી. એનો સ્વભાવ તો થર્ડ ક્લાસ અને ઈગોસ્ટીક છે. એને તો બહુ જ અભિમાન છે. એતો ક્યારેય કામમાં જ ના આવે. આવા ઘણાં બધાં વાક્યો ઘણી વ્યક્તિનાં મોંઢેથી સાંભળ્યા હશે.
દરેક વ્યક્તિમાં કોઈક સારી તો કોઈક ખરાબ આદત પણ ક્યાંક કોઈનામાં હોય છે. સો એ સો ટકા કોઈ વ્યક્તિ પરફેક્ટ નથી હોતો. દરેકમાં પ્લસ – માઈનસ હોય જ છે. પણ એ વ્યક્તિ ઉપર છે કે તમે એનામાં કયો ગુણ જુઓ છો. જો નેગેટિવ જોશો તો નેગેટિવ જ દેખાશે અને પોઝીટીવ જોશો તો પોઝીટીવ દેખાશે. જેવી નજર એવી દુનિયા છે.
એક પતિ પત્ની હતા. પત્ની હંમેશા એની સર્વન્ટમાં ખોડ ખાંપણ – ભૂલો કાઢે. આ કામ બરાબર નથી કર્યું. ડસ્ટીંગ બરાબર નથી કર્યું એમ કરીને રોજ એને ટોકે. એટલે એકવાર એનાં પતિએ એને કહ્યું, કે એક કામ કર તું આને છોડી દે અને તું જ કામ જાતે કર. ત્યાં જ પત્નીએ કહ્યું, ના રે… મારાથી કામ ના થાય. ત્યાં જ પતિએ કહ્યું, તો શું કામ આટલી બધી માથાકૂટ કરે છે. તું એને પોઝીટીવ રીતે લે કે એ કેટલા બધાં ઘરનાં કામ કરે છે. પણ તું એનામાં નેગેટીવ પોઈન્ટ જ શોધે છે. જ્યારે એણે સારું કામ કર્યું હોય ત્યારે તું એને અપ્રિસિયેટ કરવાને બદલે એતો કામ કરે જ ને એનાં તો રૂપિયા એને આપું છું એમ કહી દે છે.
ઘણી વ્યકિત તો એવી હોય છે કે વ્યક્તિની સામે મીઠું મીઠું બોલે અને એની પાછળ એનું ખરાબ બોલે. એનો અર્થ શું? જે વ્યક્તિથી તમને પ્રોબ્લેમ હોય એ પ્રોબ્લેમ બીજાને કહેવાથી સોલ્વ થઈ જશે? હા વ્યક્તિની કોઈ મેજર એવી વાત હોય – ભૂલ હોય તો તમે એને એકલાં હોવ ત્યારે શાંતિથી કહી શકો છો. પણ બધાંની સામે એનું ખરાબ બોલવાથી ખરાબ બોલનારનું જ ખરાબ લાગે છે.
બે મિત્રો હતા. એક મિત્ર હંમેશા એનાં દરેક મિત્રનું ખરાબ જ બોલે. દરેકમાં કંઈક ને કંઈક ખામી કાઢે. નવ્વાણું કામ કોઈએ એનાં સારા કર્યા હોય પણ જો એક કામ ના કર્યું હોય તો એ એનાં વિશે ખરાબ બોલે. એટલે એનાં બીજા મિત્રએ કહ્યું, “યાર સાચું કહું તો તું પણ પરફેક્ટ નથી. આમ જોવા જઈએ તો તારો સ્વભાવ જ નેગેટિવ છે. તું કોઈની સારી બાબતને જોઈ શકતો જ નથી. તું દરેકમાં કોઈને કોઈ ભૂલ કાઢે છે.”
ઘણી વ્યકિતની પ્રકૃતિ હોય છે પાણીમાંથી પોરો કાઢવાની. જે ક્યારેય કોઈનું સારું બોલી જ ના શકે. સારાને સારું ના કહી શકો તો કંઈ નહીં પણ ખરાબ તો ના કહો.
એક ગામમાં એક વ્યક્તિ આવ્યો. એણે ગામનાં એક વ્યક્તિને કહ્યું આ ગામમાં કોઈ સારું જ નથી. પેલા ભાઈ કહે હા સાચી વાત છે અહીં કોઈ સારું જ નથી. ત્યાં જ બીજો વ્યક્તિ આવ્યો તેણે એ ગામનાં ભાઈને કહ્યું, ખરેખર આ ગામમાં રહેવાની ખૂબ જ મજા આવી. અહીં બધાંનો સ્વભાવ ખૂબજ સરસ છે. બધાં સારા છે. એટલે પેલાં ભાઈએ કહ્યું હા સાચી વાત છે આ ગામમાં બધાં સારા છે. એટલે ત્યાં જ પેલી વ્યક્તિએ કહ્યું કે મેં કહ્યું ત્યારે તમે પણ ના પાડી કે આ ગામમાં કોઈ સારું નથી તો હવે કેમ સારું કહો છો?
ત્યારે ગામનાં એ વ્યક્તિ એ કહ્યું, ભાઈ એ તો દરેકની દ્રષ્ટિ – સ્વભાવ અને વિચાર ઉપર છે. જેનો સ્વભાવ અને વિચાર સારા હોય એ જ બીજી વ્યક્તિમાં સારું જોઈ શકે.
છેલ્લે… દરેક વ્યક્તિમાં કોઈક તો સારો ગુણ – પોઝીટીવ પોઈન્ટ હોય જ છે બસ એ વાત જોવા માટે તમારી દ્રષ્ટી જોઈએ.
