108 એમ્બ્યુલન્સ સેવાઓને વધુ અસરકારક બનાવવા મોબાઇલ પ્લેટફોર્મ વિકસાવાયું
સુરજ મહેતાએ નવા 108 ઇન્ટિગ્રેટેડ મોબાઇલ પ્લેટફોર્મ વિકસાવવાની કલ્પના કરી હતી
અમદાવાદ, ગુજરાત રાજ્યમાં 108 ઇમર્જન્સી એમ્બ્યુલન્સ સેવાઓને વધુ અસરકારક, ઝડપી અને અદ્યતન બનાવવા તેમજ રિસ્પોન્સનો સમય ઘટાડવાની દિશામાં વધુ એક મજબૂત પગલું ભરતા બેસ્ટ-ઇન-ક્લાસ ટેક્નોલોજી સાથે નવી 108 ઇન્ટિગ્રેટેડ મોબાઇલ પ્લેટફોર્મ અપનાવ્યું છે.
સમુદાય અને દેશની સેવા માટે સમર્પિત ગુજરાતના સુરજ મહેતાએ નવા 108 ઇન્ટિગ્રેટેડ મોબાઇલ પ્લેટફોર્મ વિકસાવવાનો ખ્યાલ વહેતો કર્યો હતો અને હાલમાં તેઓ મુંબઇની ચાર મોટી કન્સલ્ટન્સી કંપનીઓ સાથે મળીને કામ કરી રહ્યાં છે.
આ અંગે સુરજ મહેતાએ ગુજરાતના મુખ્યમંત્રી શ્રી વિજયભાઇ રૂપાણી અને સરકારના અન્ય ટોચના અધિકારીઓ સમક્ષ પ્રેઝન્ટેશન રજૂ કર્યું હતું, જેમાં મુખ્યમંત્રીએ હેલ્થકેર સર્વિસિસમાં લોકેશન આધારિત જીપીએસ ટેક્નોલોજીના ખ્યાલની પ્રસંશા કરીને તેને અમલમાં મૂકવાનો નિર્ણય કર્યો છે.
ઉલ્લેખનીય છે કે સુરજ મહેતાએ તેની કલ્પના કરવાની સાથે-સાથે તેને વાસ્તવિક બનાવવા માટે સરકારી અધિકારીઓ અને જીવીકે ઇએમઆરઆઇના અધિકારીઓ સાથે મળીને કામ પણ કર્યું છે અને તે પણ કોઇપણ પ્રકારની ફી ચાર્જ કર્યાં વિના.
આ મોબાઇલ પ્લેટફોર્મ જીવીકે ઇએમઆરઆઇ ટીમ દ્વારા બે તબક્કામાં વિકસાવાયું છે. આ ઇન્ટિગ્રેટેડ મોબાઇલ એપ્લીકેશનના પ્રથમ તબક્કાને શ્રી વિજયભાઇ રૂપાણએ 23 ઓક્ટોબર, 2017ના રોજ લોંચ કરી હતી.
તેમજ ઇન્ટિગ્રેટેડ મોબાઇલ પ્લેટફોર્મના બીજા તબક્કાને રેકોર્ડ સમયમાં પૂર્ણ કરીને 23 મે, 2018ના રોજ અમદાવાદમાં જીવીકે ઇએમઆરઆઇના મુખ્યાલયમાં શ્રી વિજયભાઇ રૂપાણી, નીતિનભાઇ પટેલ અને સત્તાવાર રીતે લોંચ કર્યું હતું.
મહત્વપૂર્ણ છે કે આ એપ્લીકેશનમાં 5 વિવિધ મોડ્યુલ્સ સામેલ છે અને સંકલિત રીતે કામ કરે છે, જેમાં સિટિઝન મોડ્યુલ, ઇમર્જન્સી રિસ્પોન્સ ટીમ (ઇએમટી) મોડ્યુલ, પાઇલોટ મોડ્યુલ, હોસ્પિટલ મોડ્યુલ અને ઇએમએસ સામેલ છે.
આ 108 ગુજરાત એપ રાજ્યભરના 4000થી વધુ હોસ્પિટલ્સના મજબૂત નેટવર્કની રચના કરવામાં મદદરૂપ બનશે, જેમાં તમામ સરકારી હોસ્પિટલ્સ અને કેટલાંક ખાનગી હોસ્પિટલ્સ સામેલ છએ.
વધુમાં પ્લેટફોર્મ ઉપર 150થી વધુ બ્લડ બેંક્સને પણ સાંકળી લેવાઇ છે, જેથી નાગરિકો અને હોસ્પિટલ્સ બંન્નેને બ્લડ યુનિટ્સ સંબંધિત માહિતી ઉપલબ્ધ બની રહે.
આ પ્લેટફોર્મનો મૂળ ઉદ્દેશ્ય આપાતકાલીન સ્થિતિમાં ટેક્નોલોજીના મહત્તમ ઉપયોગ સાથે સમય બચાવવાનો છે, જેથી દર્દીના જીવન બચાવવામાં મદદ મળી રહે.
