આલિયા-દિવ્યા વિવાદના છાંટા ‘એનિમલ પાર્ક’ પર નહીં ઊડે

સંદીપ રેડ્ડી વાંગા હાલ પ્રભાસની ‘સ્પિરિટ’માં વ્યસ્ત છે

રણબીર કપૂરના સંદીપ રેડ્ડી વાંગાની ફિલ્મ ‘એનિમલ’નો અતિશય હિંસક અવતારે ઓડિયન્સને આશ્ચર્યમાં મુકી દીધું હતુ

મુંબઈ,
રણબીર કપૂરના સંદીપ રેડ્ડી વાંગાની ફિલ્મ ‘એનિમલ’નો અતિશય હિંસક અવતારે ઓડિયન્સને આશ્ચર્યમાં મુકી દીધું હતું. આ ફિલ્મની મોટી સફળતા બાદ તેની સીક્વલની જાહેરાત કરી દેવાઈ હતી. જો કે ભૂષણ કુમારની પત્ની દિવ્યા કુમાર ખોસલાએ આલિયાની ‘જિગરા’ની રિલીઝ વખતે કરેલાં વિવાદિત નિવેદન બાદ ‘એનિમલ પાર્ક’ પર સંકટના વાદળ ઘેરાયાં હતા.

આ અંગેની અટકળોને દૂર કરતાં તાજેતરના એક ઇન્ટરવ્યુમાં ફિલ્મના પ્રોડ્યુસર ભૂષણ કુમારે ખુલાસો કર્યાે હતો અને આ અફવાઓને ફગાવી હતી. ‘એનિમલ પાર્ક’ પર કામ શરૂ થઈ ચૂક્યું હોવાની ખાતરી તેમણે આપી દીધી છે. ભૂષણ કુમારે કહ્યું કે સંદીપ રેડ્ડી વાંગા હાલ પ્રભાસની ‘સ્પિરિટ’માં વ્યસ્ત છે. એ પૂરું થયા પછી છ મહિનાની અંદર જ તે ‘એનિમલ પાર્ક’નું કામ શરૂ કરી દેશે.

ભૂષણ કુમારે કહ્યું,“અમારી પાસે છ મહિનાનો સમયગાળો હશે, પછી તરત એનિમલ પાર્કનું કામ શરૂ થઈ જશે.” વાંગાએ વચન આપ્યું હતું કે એનિમલ પાર્ક આગળની ફિલ્મ કરતાં વધુ ડાર્ક અને વધુ સ્વાર્થી પાત્રો સાથે આવશે. રણબીર પણ આ ફિલ્મ માટે ઉત્સુક છે. આ ફિલ્મનું શૂટિંગ ૨૦૨૬માં શરૂ થવાની શક્યતા છે. એ પહેલાં રણબીર નિતેશ તિવારીની રામાયણના બંને ભાગ અને સંજય લીલા ભણસાલીની આલિયા અને વિકી કૌશલ સાથેની લવ એન્ડ વોરનું કામ પૂરું કરશે. ss1