ઈબ્રાહિમ અલી ખાન અને શ્રીલીલા: નવી પેઢીની ફ્રેશ પેર

સૈફ અલી ખાનના દીકરાની પહેલી ફિલ્મમાં સાઉથની એક્ટ્રેસનો લીડ રોલ

સામાન્ય રીતે ઈબ્રાહિમ અલી ખાન અંગત જીવનમાં પલક તિવારી સાથેના સંબંધો બાબતે ચર્ચામાં રહેતો હોય છે

મુંબઈ,સૈફ અલી ખાન અને અમૃતા સિંગનો દીકરો ઈબ્રાહિમ અલી ખાન બોલિવૂડમાં પહેલી ફિલ્મ કરવા જઈ રહ્યો છે. ઈબ્રાહિમની આ ડેબ્યુ ફિલ્મને દિનેશ વિજાન પ્રોડ્યુસ કરી રહ્યા છે. તેમાં કો-સ્ટાર તરીકે સાઉથની જાણીતી એક્ટ્રેસ શ્રીલીલાને પસંદ કરવામાં આવી છે. મેડ્ડોક ફિલ્મ્સના આ પ્રોજેક્ટમાં નવી પેઢીના સ્ટાર્સની ળેશ પેરને જોવા ઉત્સુકતા છવાઈ રહી છે.

તાજેતરમાં લંડન ખાતે ફિલ્મનું એક શીડ્યુલ પૂરું થયું છે. જાણીતા પ્રોડક્શન હાઉસ અને સ્ટાર કિડના કોમ્બિનેશન ઉપરાંત સાઉથ અને બોલિવૂડનું સંતુલન સાધવાનો પ્રયાસ પણ આ ફિલ્મમાં થયેલો છે. અમેરિકાના ડેટ્રોઈટમાં જન્મેલી શ્રીલીલાએ ૧૭ વર્ષની ઉંમરે ચાઈલ્ડ આર્ટિસ્ટ તરીકે સાઉથની ફિલ્મોમાં કામ કર્યું હતું. ૨૩ વર્ષની થતાં સુધીમાં શ્રીલીલાએ ડઝન જેટલી ફિલ્મો કરી છે અને સાઉથમાં તેનો ફેન બેઝ ઘણો મોટો છે. કરણ જોહરના પ્રોડક્શનમાં ‘સરઝમીન’માં પણ ઈબ્રાહિમ અલી ખાનનો લીડ રોલ છે.

મેડ્ડોક ફિલ્મ્સની ‘સ્ત્રી’ ફ્રેન્ચાઈઝને અપેક્ષા કરતાં વધુ સફળતા મળેલી છે. હવે આ પ્રોડક્શન હાઉસનો આત્મવિશ્વાસ વધ્યો છે. તેથી ઈબ્રાહિમની ડેબ્યુ ફિલ્મને ફોરેન લોકેશન્સ પર શૂટ કરવાની સાથે વીએફએક્સનો ભરપૂર ઉપયોગ કરવાનું પણ આયોજન છે. સામાન્ય રીતે ઈબ્રાહિમ અલી ખાન અંગત જીવનમાં પલક તિવારી સાથેના સંબંધો બાબતે ચર્ચામાં રહેતો હોય છે. આ વખતે તેની કરિયરની ચર્ચા થઈ રહી છે ત્યારે સ્ટારકિડને આ શરૂઆત કેટલી ફળે છે તે જોવું રહ્યું. ss1