જિલ્લા પોલીસ અધિક્ષકશ્રીના અધ્યક્ષપદે ડિસ્ટ્રીક્ટ રોડ સેફ્ટી કમિટીની યોજાયેલી બેઠક

નર્મદા જિલ્લામાં માર્ગ અકસ્માતથી થતાં મૃત્યુની સંખ્યામાં ઘટાડો થાય તે રીતનું સૂચારૂ આયોજન ઘડી કાઢવા જિલ્લા પોલીસ અધિક્ષકશ્રી પ્રશાંત સુંબેનો અનુરોધ

રોંગ સાઈડમાં વાહન ચલાવે તો તેનું લાઈસન્સ સસ્પેન્ડ કરવા અને જો લાઈસન્સ ન ધરાવતાં હોય તેવા વાહન ચાલકો સામે ગુનો નોંધી કાયદેસરની કાર્યવાહી હાથ ધરવાની શ્રી સુંબેની તાકીદ

રાજપીપલા, નર્મદા જિલ્લાના પોલીસ અધિક્ષકશ્રી પ્રશાંત સુંબેના અધ્યક્ષપદે આજે રાજપીપલા કલેક્ટર ઓફીસ ખાતે યોજાયેલી ડિસ્ટ્રીક્ટ રોડ સેફ્ટી કમિટીની બેઠકમાં નર્મદા જિલ્લાનો રોડ સેફ્ટી એક્શન પ્લાન-૨૦૨૨-૨૩ ને મંજૂર કર્યો હતો તેમજ જિલ્લામાં માર્ગ અકસ્માતથી થતાં મૃત્યુની સંખ્યામાં ઘટાડો થાય તે રીતનું સૂચારૂ આયોજન ઘડી કાઢવા પર ખાસ ભાર મૂક્યો હતો. આ બેઠકમાં નિવાસી અધિક કલેકટરશ્રી એચ.કે. વ્યાસ, નાયબ પોલીસ અધિક્ષકશ્રી એસ.જે.મોદી અને સુશ્રી વાણી દુધાત, સભ્ય સચિવ,ડિસ્ટ્રિક્ટ રોડ સેફ્ટી કમિટી અને સહાયક પ્રાદેશિક વાહન વ્યવહાર અધિકારીશ્રી કે.એમ.ખપેડ, ગુજરાત રોડ સેફ્ટી ઓથોરીટીના પ્રતિનિધી, રાજપીપલા નગર પાલિકાના ચીફ ઓફીસરશ્રી રાહુલ ડોઢીયા, સિવીલ સર્જન ડૉ. જ્યોતિબેન ગુપ્તા, નાયબ જિલ્લા પ્રાથમિક શિક્ષણાધિકારી શ્રીમતી વર્ષાબેન વસાવા, માર્ગ અને મકાન વિભાગ સહિત જિલ્લાના સંબંધિત અમલીકરણ અધિકારીશ્રીઓની ઉપસ્થિતિમાં યોજાયેલી ઉક્ત બેઠકને સંબોધતા જિલ્લા પોલીસ
અધિક્ષકશ્રી પ્રશાંત સુંબેએ જિલ્લામાં જાહેર પાર્કિંગની સુવિધા સુનિશ્ચિત કરવા, જરૂરીયાત જણાય ત્યાં પાર્કિંગ ઝોન તેમજ નો-પાર્કિંગ ઝોન ઉભા કરવાની સાથે ડિસ્ટ્રીક્ટ રોડ સેફ્ટી અંતર્ગત બહાર પડાયેલ જાહેરનામાનો ચુસ્તપણે અમલ કરવાં, કરાવવાની સાથોસાથ રોડ સેફ્ટી એક્શન પ્લાન-૨૦૨૧ અંતર્ગત જિલ્લામાં જે કામો અધુરા હોય તે કામો સમયમર્યાદામાં પૂર્ણ કરવાની શ્રી સુંબેએ તાકીદ કરી હતી.

ઉક્ત બેઠકમાં જિલ્લા પોલીસ અધિક્ષકશ્રી પ્રશાંત સુંબેએ ચાલુ ડ્રાઇવિંગમાં મોબાઇલ પર વાત કરતાં, હેલ્મેટ, સીટ બેલ્ટ, ઓવરસ્પીડીંગ જેવા કિસ્સાઓમાં વાહન ચાલકો વિરૂધ્ધ દંડની વસુલાત કરવાની સૂચના પણ આપી હતી. આ બેઠકમાં જિલ્લા પોલીસ અધિક્ષકશ્રી સુંબેએ જિલ્લામાં વર્ષ-૨૦૨૧ દરમિયાન થયેલ અકસ્માતોના આંકડાઓની ચકાસણી કરીને બ્લોકસ્પોટ નક્કી કરવામાં આવેલ છે તે બ્લોકસ્પોટની સંયુક્ત વિઝીટનુ આયોજન કરવા અને બ્લોકસ્પોટ દૂર કરવા માટે જરૂરી કાર્યવાહી હાથ ધરવા, સાગબારાના અમિયાર ગામ પાસે થતાં અકસ્માત અટકાવવા, તિલકાવાડા તાલુકાના ગેગડિયાથી ઉતાવળી રસ્તા પર બમ્પ મુકવાની રજૂઆતને ધ્યાને લઈ જરૂરી કાર્યવાહી કરવાની સાથે સુપ્રીમ કોર્ટ કમિટી ઓન રોડ સેફ્ટી દ્વારા આપવામાં આવેલ દિશા-નિર્દેશોનો અમલ કરવા

ઉપરાંત કમ્પેન્સેશન ટુ વીક્ટીમ ઓફ હીટ એન્ડ રન મોટર એક્સીડેન્ટ સ્કીમ-૨૦૨૨ અંગે પણ જરૂરી ચર્ચા-વિચારણા કરવામાં આવી હતી. વાહનચાલકો જો રોંગ સાઈડમાં વાહન ચલાવે તો તેનું લાઈસન્સ સસ્પેન્ડ કરવા અને જો લાઈસન્સ ન ધરાવતાં હોય તેવા વાહન ચાલકો સામે ગુનો નોંધી કાયદેસરની કાર્યવાહી સત્વરે હાથ ધરવા શ્રી સુંબેએ જણાવ્યું હતું.આ પ્રસંગે મોટર વાહન નિરીક્ષકશ્રી અને રોડ સેફ્ટી નોડલ અધિકારીશ્રી વી.ડી.અસલે ઉક્ત બેઠકની રૂપરેખા રજુ કરી હતી.