તાલાલા યાર્ડમાં કેરીની સીઝન પૂરી : ૨૩ વર્ષના ઇતિહાસનું સૌથી નબળું વર્ષ

૨૦૦૧-૦૨ પછી પ્રથમવાર આટલો મોટો ઘટાડો

તાલાલા માર્કેટિંગ યાર્ડ, જે ગીરમાં કેરીની હરાજી માટેનું એકમાત્ર કેન્દ્ર છે, ત્યાં આ વર્ષે કેરીની પ્રથમ હરાજી ૨૬ એપ્રિલ ૨૦૨૫ના રોજ શરૂ થઈ હતી

તાલાલાગીર,ગીર પંથકની ગૌરવવંતી કેસર કેરીની ૨૦૨૫ની સીઝન તાલાલા માર્કેટિંગ યાર્ડ ખાતે આજે છેલ્લા દિવસની જાહેર હરાજી સાથે સત્તાવાર રીતે પૂરી થઈ છે. જોકે, આ વર્ષ ગીરના ખેડૂતો અને કેરીના વેપારીઓ માટે અત્યંત નિરાશાજનક રહ્યું છે, કારણ કે પાછલા ૨૩ વર્ષના ઇતિહાસમાં આ પ્રથમ વખત સૌથી ઓછી કેસર કેરીની આવક નોંધાઈ છે.તાલાલા માર્કેટિંગ યાર્ડ, જે ગીરમાં કેરીની હરાજી માટેનું એકમાત્ર કેન્દ્ર છે, ત્યાં આ વર્ષે કેરીની પ્રથમ હરાજી ૨૬ એપ્રિલ ૨૦૨૫ના રોજ શરૂ થઈ હતી અને ૮ જૂન ૨૦૨૫ના રોજ સમાપ્ત થઈ હતી.
આમ, આ સીઝન કુલ ૪૪ દિવસ ચાલી હતી.

આ સમયગાળા દરમિયાન, યાર્ડમાં ૧૦ કિલોના કુલ ૪,૪૯,૪૫૦ બોક્સની આવક થઈ હતી.આ આંકડો ૨૦૦૧-૨૦૦૨ના વર્ષ પછીનો સૌથી ઓછો છે. ૨૦૦૧-૨૦૦૨માં તાલાલા માર્કેટિંગ યાર્ડ ખાતે ૪,૩૧,૪૩૦ બોક્સની આવક નોંધાઈ હતી, જ્યારે સરેરાશ ભાવ પ્રતિ ૧૦ કિલોના રૂ. ૭૫૦ હતા. તેની સરખામણીએ ૨૦૨૫માં ભાવ પ્રતિ ૧૦ કિલોના રૂ. ૫૬૦ સુધી પહોંચ્યા હોવા છતાં, આવકમાં મોટો ઘટાડો જોવા મળ્યો છે. આ વર્ષે કેસર કેરીના ઉત્પાદનમાં ઘટાડા પાછળનું મુખ્ય કારણ વાતાવરણની પ્રતિકૂળતા અને કમોસમી વરસાદને ગણાવવામાં આવી રહ્યું છે.

અણધાર્યા વાતાવરણ પલટા અને અનિયમિત વરસાદે કેરીના પાકને મોટું નુકસાન પહોંચાડ્યું, જેના પરિણામે છેલ્લા ૨૩ વર્ષના તાલાલા માર્કેટિંગ યાર્ડના ઇતિહાસમાં આટલી ઓછી સંખ્યામાં કેરીના બોક્સની આવક થઈ છે.તાલાલા માર્કેટિંગ યાર્ડના ચેરમેને જણાવ્યું હતું કે, આ વર્ષે અંદાજિત ૨૪ થી ૨૬ કરોડ રૂપિયાની કેરીનું વેચાણ તાલાલામાંથી થયું છે.” જોકે, ખેડૂતો અને વેપારીઓ માટે આ વર્ષને “અતિ નબળું” સાબિત કરે છે.SS1