દિલ્હી-મુંબઇ ફ્લાઇટમાં અભિનેત્રીની છેડતી કરનાર બિઝનેસમેનની ધરપકડ
નવી દિલ્હી, ગાઝિયાબાદના એક બિઝનેસમેનની દિલ્હીથી મુંબઇ જઇ રહેલી ફ્લાઇટમાં એક અભિનેત્રીની છેડતી કરવાના આરોપમાં ધરપકડ કરવામાં આવી છે. આ ૪૦ વર્ષીય અભિનેત્રીએ તેની પોલીસ ફરિયાદમાં આરોપ મૂક્યો છે કે, તે ૩ ઓક્ટોબરે દિલ્હીથી મુંબઇ જઇ રહી હતી, ત્યારે તેની સાથે છેડતીની ઘટના બની હતી.
અભિનેત્રીએ મૂકેલા આરોપ અનુસાર, જ્યારે પ્લેન છત્રપતિ શિવાજી મહારાજ ઇન્ટરનેશનલ ટર્મિનલ પર લેન્ડ થયું અને તે બેગ નીકાળવા માટે ઓવરહેડ સ્ટોરેજ ખોલવા ઊભી થઇ ત્યારે તેને લાગ્યું કે કોઇએ તેને ખોટી રીતે સ્પર્શ કર્યો છે. જેની સામે અભિનેત્રીએ આકરી પ્રતિક્રિયા આપી હતી અને કેબિન ક્રૂને પણ ફરિયાદ કરી હતી.
અભિનેત્રીની નારાજગીને જોતાં આરોપીએ તેની માફી માંગી હતી. આ વાતની પુષ્ટિ કેબિન ક્રૂએ કરી છે. પ્લેનના ક્રૂએ અભિનેત્રીની ઇમેલ પર કરેલી ફરિયાદ શહેર એરપોર્ટ પોલીસ સ્ટેશનને મોકલી આપી હતી. આ મામલે તપાસ કરતાં પોલીસે નિતિન નામના વ્યક્તિની ધરપકડ કરી છે. પોલીસ તપાસમાં જાણવા મળ્યું કે, આરોપી ગાઝિયાબાદમાં મોટો વેપારી છે અને તે સંદર્ભે મુંબઇ અવરજવર કરતો રહે છે.
