દીપિકાએ કાર્તિક સાથે ફિલ્મ કરવાની ઈચ્છા વ્યક્ત કરી
મુંબઈ: બોલિવુડ એક્ટર કાર્તિક આર્યન અને એક્ટ્રેસ દીપિકા પાદુકોણ ચર્ચામાં હતા. રવિવારે પતિ પત્ની ઔર વોના એક્ટર કાર્તિક આર્યનનો બર્થ ડે હતો. ત્યારે દીપિકાએ તેને શુભેચ્છા પાઠવવાની સાથે તેની જોડે ફિલ્મ કરવાની ઈચ્છા વ્યક્ત કરી હતી. જેના પર સોમવારે કાર્તિક આર્યને જવાબ આપ્યો છે.
દીપિકા પાદુકોણે કાર્તિક આર્યનની તસવીર ઈન્સ્ટાગ્રામ સ્ટોરીમાં શેર કરીને લખ્યું હતું, હેપી બર્થ ડે. આશા રાખું કે આપણે આ વર્ષે સાથે એક ફન ફિલ્મ સાઈન કરીએ. દીપિકાના આ પ્રપોઝલ પર કાર્તિક આર્યને જવાબ આપ્યો છે.
કાર્તિકે જવાબ આપતાં લખ્યું, તમે બસ તારીખો તૈયાર રાખો! ફન અને ફિલ્મ હું લઈને આવી રહ્યો છું. જો કે, આ પહેલીવાર નથી જ્યારે કાર્તિક આર્યને દીપિકા સાથે કામ કરવાની ઈચ્છા વ્યક્ત કરી હોય. અગાઉ પણ કાર્તિકે દીપિકા સાથે પોતાની તસવીર શેર કરીને લખ્યું હતું, છે કોઈ ડાયરેક્ટરમાં દમ?
આ સિવાય કાર્તિક આર્યનની ફિલ્મ પતિ પત્ની ઔર વો રિલીઝ થવાની હતી ત્યારે તેણે અને દીપિકાએ મળીને મુંબઈ એરપોર્ટ ડાન્સ કર્યો હતો. કાર્તિકે મુંબઈ એરપોર્ટ પર દીપિકાને ધીમે ધીમે સોન્ગના સ્ટેપ શીખવ્યા હતા.
દીપિકા અને કાર્તિકનો વિડીયો સોશિયલ મીડિયા પર વાયરલ થયો હતો. ત્યારથી જ ફેન્સ આ બંનેને ફિલ્મમાં સાથે જોવા ઉત્સુક છે. વર્કફ્રંટની વાત કરીએ તો, દીપિકાએ શકુન બત્રાની ફિલ્મનું શૂટિંગ પૂરું કરીને શાહરૂખ ખાન સાથેની ફિલ્મ પઠાણનું શૂટ શરૂ કર્યું છે. શકુન બત્રાની ફિલ્મમાં દીપિકા પાદુકોણ સાથે સિદ્ધાંત ચતુર્વેદી અને અનન્યા પાંડે પણ છે. આ સિવાય દીપિકા પાદુકોણ પતિ રણવીર સિંહ સાથેની ફિલ્મ ૮૩ની રિલીઝની રાહ જોઈ રહી છે. કપિલ દેવના જીવન પરથી બનેલી આ ફિલ્મની દીપિકા કો-પ્રોડ્યુસર પણ છે.
