પુનિત-નિધિનું રિસેપ્શન મસ્તી અને ડાન્સથી ભરપૂર
મુંબઈ: પોપ્યુલર ડાન્સર અને કોરિયોગ્રાફર પુનિત પાઠકે ગર્લફ્રેન્ડ નિધિ મુની સિંહ સાથે લગ્ન કરી લીધા છે. ૧૧ ડિસેમ્બરના રોજ નિધિ-પુનિતે પ્રભુતામાં પગલાં પાડ્યા હતા. લોનાવાલામાં લગ્ન બાદ ત્યાં જ રિસેપ્શનનું આયોજન કરવામાં આવ્યું હતું. જેમાં હર્ષ લિંબાચિયા, ભારતી સિંહ, મૌની રોય, મુક્તિ મોહન અને શક્તિ મોહન, ધર્મેશ સર, આદિત્ય નારાયણ અને પત્ની શ્વેતા જેવા સેલેબ્સ ઉપસ્થિત રહ્યા હતા.
પુનિત અને નિધિના રિસેપ્શનના વિડીયો સોશિયલ મીડિયા પર ખૂબ વાયરલ થઈ રહ્યા છે. આ ખાસ હેશટેગ કપલે પોતાના લગ્ન માટે બનાવ્યું હતું. નિધિ અને પુનિતનું રિસેપ્શન ડાન્સ, મસ્તી, ધમાલ અને રોમાન્સથી ભરપૂર રહ્યું હતું. ડ્રગ્સ કેસના કારણે છેલ્લા થોડા અઠવાડિયાઓથી ચર્ચામાં રહેલી કોમેડિયન ભારતી સિંહ અને પતિ હર્ષ લિંબાચિયા પુનિતના લગ્ન તેમજ રિસેપ્શનમાં હાજર રહ્યા હતા. ભારતી અને હર્ષે ન્યૂલી વેડ કપલ સાથે પોઝ આપ્યો હતો. તો ભારતીએ પુનિતના રિસેપ્શનમાં ડાન્સ પણ કર્યો હતો.
ફોટોગ્રાફર વિરલ ભાયાણીએ પોતાના ઈન્સ્ટાગ્રામ પેજ પર આ વિડીયો અને તસવીર શેર કર્યા છે. પુનિતના રિસેપ્શનમાં ધર્મેશે હાજરી આપી હતી. જાણીતો કોરિયોગ્રાફર રેમો ડિસૂઝાને હાર્ટ અટેક આવતા ધર્મેશ પુનિતના લગ્નમાં તો હાજરી નહોતો આપી શક્યો પરંતુ તેમની હાલત સુધરતાં રિસેપ્શનમાં ચોક્કસ આવ્યો હતો.
આ ઉપરાંત પુનિતના અન્ય ડાન્સર ફ્રેન્ડ્સ પણ પાર્ટીમાં સામેલ થયા હતા. રિસેપ્શનમાં પુનિત અને નિધિએ વિવિધ ગીતો પર રોમાન્ટિક ડાન્સ પણ કર્યો હતો. કુછ કુછ હોતા હૈ ગીત પર પર્ફોર્મ કર્યા બાદ એકબીજાને ભેટીને પુનિત અને નિધિ ઈમોશનલ થઈ ગયા હતા. કપલ માટે ક્ષણ ખૂબ જ સુંદર હતી અને હોય પણ કેમ નહીં? જેને પ્રેમ કર્યો તેની સાથે જિંદગી વિતાવવાથી મોટી ખુશી કઈ હોઈ શકે?
પુનિત પાઠક અને નિધિએ રિસેપ્શન પહેલા ફ્રેન્ડ્સ સાથે નાનકડી પાર્ટીનું આયોજન કર્યું હતું. જેમાં કપલ મેચિંગ વ્હાઈટ આઉટફિટમાં જાેવા મળ્યા હતા. માથામાં સિંદૂર અને હાથમાં લાલચૂડા સાથે નિધિ ખૂબસૂરત લાગતી હતી.
આ પાર્ટીમાં પણ કપલે ખૂબ ડાન્સ કર્યો હતો. નિધિ ઉપરાંત પુનિતે પોતાના ફ્રેન્ડ્સ સાથે પણ ખૂબ ડાન્સ કર્યો હતો. ધમાલ-મસ્તીભરી પાર્ટી અને રિસેપ્શનના વિડીયો સોશિયલ મીડિયા પર વાયરલ થઈ રહ્યા છે. પુનિત પાઠકના રિસેપ્શનમાં એક્ટ્રેસ મૌની રોયે પણ કજરા રે ગીત પર ડાન્સ કર્યો હતો. વ્હાઈટ લહેંગામાં મૌની હંમેશાની જેમ સુંદર લાગી રહી હતી. ઉલ્લેખનીય છે કે, રિયાલિટી શો ‘ઝલક દિખલા જા ૭’માં પુનિત મૌની રોયનો કોરિયોગ્રાફર હતો.
