ભાઈઓએ સાત મહિનાની ગર્ભવતી બહેનની હત્યા કરી
બરેલી, ઉત્તર પ્રદેશમાંથી હોનર કિલિંગનો સનસનીખેજ બનાવ સામે આવ્યો છે. પ્રેમી સાથે ભાગી જતાં ભાઈઓએ ૭ મહિનાની ગર્ભવતી બહેનની ગોળી મારીને હત્યા કરી દીધી હતી. બે મોટા ભાઈઓએ પેટમાં જ ગોળી મારીને બહેનની અને તેના ભ્રૃણમાં રહેલાં બાળકની હત્યા કરી ફરાર થઈ ગયા હતા.
આ ઘટના સામે આવતાં જ સમગ્ર પંથકમાં ચકચાર મચી જવા પામી છે. પોલીસે આ મામલે હત્યાનો ગુનો નોંધીને બંને ફરાર આરોપીઓને શોધવા ચક્રો ગતિમાન કર્યાં છે.
બહેને પરિવારની મરજી વિરુદ્ધ પોતાની પસંદના યુવક સાથે લગ્ન કરતાં બંને ભાઈઓ નારાજ હતા. તેમજ બહેન ઘરેથી ભાગી જવાને કારણે પરિવારને જે અપમાનનો સામનો કરવો પડ્યો હતો તેનો બદલો લેવા માટે બંને ભાઈઓ તડપી રહ્યા હતા. અને બદલો લેવા માટે ભાઈઓએ ખૌફનાક પ્લાન બનાવ્યો હતો. હોસ્પિટલમાંથી ચેક અપ બાદ પરત ફરી રહેલી ગર્ભવતી બહેનને બંને ભાઈઓએ પેટમાં જ ગોળી મારી હતી.
ઈજાગ્રસ્ત બહેનને તાત્કાલિક સારવાર અર્થે હોસ્પિટલ લઈ જવામાં આવી હતી. પણ ટૂંકી સારવાર બાદ જ તેનું મોત નિપજ્યું હતું. આ ઘટના સામે આવતાં સમગ્ર પંથકમાં ચકચાર મચી જવા પામી હતી.
ઉત્તર પ્રદેશના બુડાઉન જિલ્લાના એસએસપી ઓ.પી.સિંહે આ મામલે જણાવ્યું હતું કે, વર્ષ ૨૦૨૧માં ગૌરામાઈ ગામની રહેવાસી શિબલી બીએ અલાહપુરના ફહીમ ખાન સાખે લગ્ન કર્યા હતા. અને થોડા દિવસો અગાઉ જ તે પોતાના પિયર ગૌરામાઈ ગામમાંથી પોતાની સાસરીમાં આવી હતી.
મંગળવારની બપોરે પોતાના પતિ અને અન્ય સંબંધીઓની સાથે તે હોસ્પિટલમાં ચેક અપ માટે ગઈ હતી. અને જ્યારે તે હોસ્પિટલમાંથી ઘરે પરત ફરી રહી હતી ત્યારે તેના બે ભાઈઓ મોઆઝામ અને મુઝીબ ખાને રસ્તામાં તેઓને અટકાવ્યા હતા અને શિબલીના પેટમાં ગોળી મારી ત્યાંથી ફરાર થઈ ગયા હતા.
એસએસપી ઓ.પી.સિંહે જણાવ્યું કે, બંને ફરાર આરોપીઓ સામે હત્યાનો ગુનો નોંધવામાં આવ્યો છે. અને તેઓને ટૂંક સમયમાં ઝડપી લેવામાં આવશે. આ ઉપરાંત ગામમાં સ્થિતિ પર નિયંત્રણ કરવા માટે પોલીસ બંદોબસ્ત પણ ગોઠવી દેવામાં આવ્યો છે તેવું પણ એસએસપી સિંહે જણાવ્યું હતું.SSS