મુંબઈના શિરે ટોપરનો તાજ, રાજસ્થાન રોયલ્સ પ્લેઓફની રેસમાંથી બહાર

રોહિતે આ સિઝનની ત્રીજી ફિફ્ટી ફટકારી હતી

ચેન્નાઈ બાદ રોયલ્સ નોકઆઉટમાંથી બહાર થનાર બીજી ટીમ બની છે, મુંબઈએ સળંગ છઠ્ઠી મેચમાં વિજય મેળવ્યો હતો

જયપુર,મુંબઈ ઈન્ડિયન્સે આઈપીએલમાં શાનદાર કમબેક રાજસ્થાન સામે ૧૦૦ રનથી દબદબા સાથે વિજય મેળવતા ૧૧ મેચમાં સાતમી જીત સાથે પોઈન્ટ ટેબલમાં ટોપરનો તાજ ધારણ કર્યાે છે. જયપુરમાં આઈપીએલની આ સિઝનની ૫૦મી મેચમાં મુંબઈએ રોહિત અને રિકલટનની ફિફ્ટી ઉપરાંત પ્રથમ વિકેટની સદીની ભાગીદારી સાથે બે વિકેટે ૨૧૭ રનનો વિશાળ સ્કોર રજૂ કર્યાે હતો. જવાબમાં રાજસ્થાન રોયલ્સ ૧૬.૧ ઓવરમાં ૧૧૭ રનમાં ખખડ્યું હતું. આ પરાજય સાથે રાજસ્થાન પ્લેઓફની રેસમાંથી બહાર થઈ ગયું છે. ચેન્નાઈ બાદ રોયલ્સ નોકઆઉટમાંથી બહાર થનાર બીજી ટીમ બની છે.

મુંબઈએ સળંગ છઠ્ઠી મેચમાં વિજય મેળવ્યો હતો. રાજસ્થાનનો બેટિંગમાં ફિયાસ્કો થયો હતો. ગત મેચમાં ગુજરાત સામે ૩૫ બોલમાં સદી ફટકારીને ચર્ચામાં આવેલા બેટ્‌સમેન વૈભવ સુર્યવંશીનો જાદુ આજે ચાલ્યો નહતો. દીપક ચાહરની પ્રથમ ઓવરમાં બે બોલમાં તે શૂન્ય પર જેક્સના હાથે કેચઆઉટ થયો હતો. ત્યારબાદની બીજી ઓવરમાં ડાબોડી ઓપનર જયસ્વાલ (૧૩) પણ બોલ્ડ થયો હતો. મુંબઈએ બેટિંગ બાદ બોલિંગમાં પણ આક્રમકતા દર્શાવી હતી અને રાજસ્થાન રોયલ્સે ૯૧ રનમાં નવ વિકેટ ગુમાવતા તેમનો પરાજય નિશ્ચિત હતો. જોળા આર્ચરે ૨૭ બોલમાં બે ચોગ્ગા અને બે છગ્ગા સાથે સર્વાધિક ૩૦ રન કર્યા હતા.

બોલ્ટ અને કર્ણે ત્રણ-ત્રણ વિકેટ ખેરવી હતી. બુમરાહે બે જ્યારે ચાહર અને હાર્દિકે એક-એક વિકેટ લીધી હતી. ટોસ જીતીને રાજસ્થાને પ્રથમ બોલિંગ લીધી હતી. કાર્યકારી સુકાની પરાગનો આ દાવ ઉંધો પડ્યો હતો. મુંબઈના ઓપનર અને મેન ઓફ ધ મેચ બનેલા રિકલટને ૩૮ બોલમાં સાત ચોગ્ગા અને ત્રણ છગ્ગા સાથે ૬૧ રન ફટકાર્યા હતા. બીજીતરફ રોહિત શર્માને છ રન પર એલબી આઉટ અપાયા બાદ ડીઆરએસમાં લેગની બહાર બોલ જતો હોવાથી ટીવી અમ્પાયરે નોટઆઉટ આપ્યો હતો. રોહિતે ૩૬ બોલમાં નવ ચોગ્ગાની મદદથી ૫૩ રન ઝૂડ્યા હતા. રોહિતે આ સિઝનની ત્રીજી ફિફ્ટી ફટકારી હતી. પ્રથમ વિકેટ માટે બંનેએ ૧૧૬ રનની ભાગીદારી સાથે મજબૂત પાયો નાંખ્યો હતો. ત્યારબાદ હાર્દિક ૪૮ રન કરીને નોટઆઉટ રહ્યો હતો. સુર્યકુમાર પણ ૨૩ બોલમાં તેટલા જ રને અણનમ રહ્યો હતો. છેલ્લી પાંચ ઓવરમાં મુંબઈએ ૭૧ રન ઝૂડ્યા હતા. હાર્દિક અને સુર્યકુમાર વચ્ચે ૯૪ રનની અણનમ પાર્ટનરશિપ થઈ હતી. ss1