રણબીરની બંને ‘રામાયણ’ દિવાળીના દિવસોમાં રિલીઝ થશે

આ ફિલ્મ બે ભાગમાં રિલીઝ થશે

ઈતિહાસ અને સાંસ્કૃતિક વારસાના જતન સાથે દર્શકોને વિશ્વસનીય ‘રામાયણ’ બતાવવાનું વચન અપાયું

મુંબઈ,રણબીર કપૂર ‘રામાયણ’માં રામનો રોલ કરી રહ્યો છે, તેવી તસવીરો અને અહેવાલો આવી રહ્યા હતા, પરંતુ ફિલ્મની ટીમ દ્વારા આ અંગે અત્યાર સુધીમાં કોઈ અપડેટ આવી નહોતી. અંતે હવે ફિલ્મના પ્રોડ્યુસર દ્વારા પોસ્ટર શેર કરવાની સાથે આ ફિલ્મ અંગે ઓફિશિયલ જાહેરાત કરવામાં આવી છે. નિતેશ તિવારી દ્વારા ડિરેક્ટ થઈ રહેલી આ ફિલ્મ બે ભાગમાં રિલીઝ થશે. જેનો પહેલો ભાગ દિવાળી ૨૦૨૬ અને બીજો ભાગ દિવાળી ૨૦૨૭ પર રિલીઝ કરવામાં આવશે. રામાયણના પ્રોડ્યુસર પ્રાઇમ ફોકસ સ્ટુડિયોઝના નમિત મલ્હાત્રાની આ ફિલ્મમાં રણબીર કપૂર, સાઇ પલ્લવી અને યશ મુખ્ય પાત્રમાં જોવા મળશે.

આ ફિલ્મના પોસ્ટર શેર કરતા પ્રોડ્યુસરે જણાવ્યું,“આ મહાકાવ્યનું એડપ્શન ભારતની સૌથી લોકપ્રિય ગાથાને એક વૈભવી સ્તર પર અને અનોખી શૈલીમાં જીવંત કરશે.” મલ્હાત્રાએ ઇન્સ્ટાગ્રામ પર પોસ્ટર શેર કર્યું હતું, જેમાં એક તીર આગની જ્વાળાઓ સાથે ઉપર તરફ જઈ રહ્યું છે. આ પોસ્ટરમાં ફિલ્મના બંને ભાગની રિલીઝ અંગેની માહિતી, ડિરેકટર તેમજ પ્રોડ્યુસરના નામ રજૂ કરાયા છે.તેમણે આ પોસ્ટર સાથેની કૅપ્શનમાં લખ્યું હતું, “એક દાયકાથી પણ વધુ સમય પહેલાં, આ મહાગાથા જેણે ૫૦૦૦થી પણ વધુ વર્ષ સુધી લોકોના મન પર રાજ કર્યું છે તેને મોટા પડદા પર ઉતારવાની સફર શરૂ કરી હતી. અને આજે, હું તેને સુંદર આકાર પ્રાપ્ત કરતી જોઈને અતિ ઉત્સુક છું.

કારણ કે, અમારી ટીમે તેના માટે માત્ર એક ઉદ્દેશ –આપણા ઇતિહાસ, આપણું સત્ય અને આપણી સંસ્કૃતિ –આપણી રામાયણને વિશ્વભરના લોકો માટે, સૌથી વિશ્વસનીય, પવિત્ર અને દર્શક માટે એક અદભૂત અનુભવ સમાન કામ તૈયાર કરવા માટે અથાગ પ્રયત્નો કર્યા છે.”તેમણે આગળ લખ્યું, “અમે ગૌરવ અને આદરભાવ સાથે આ મહાન ગાથાનો પહેલો ભાગ દિવાળી ૨૦૨૬ પર અને દિવાળી ૨૦૨૭માં બીજો ભાગ રજૂ કરીને અમારું સપનું પૂરું કરી રહ્યાં છીએ, ત્યારે આપ પણ અમારી સાથે જોડાઓ. અમારા સમગ્ર રામાયણ પરિવાર તરફથી આમંત્રણ છે.” નિતેશ તિવારી આ પહેલાં દંગલ અને છિછોરે જેવી લોકપ્રિય અને સફળ ફિલ્મો આપી ચૂક્યા છે. ss1