રાજસ્થાનના બુન્દીમાં એક જ છોકરીના પ્રેમમાં પાગલ બે પિતરાઈ ભાઈઓનો આપઘાત

બંનેએ ટ્રેન નીચે ઝંપલાવીને આપઘાત કરતા પહેલા વીડિયો બનાવ્યો હતો, બંનેનાં હાથ પર હાથ પર આશા લખેલું હતું

જયપુર, આઠમી માર્ચના રોજ વિશ્વમાં મહિલા દિવસની ઉજવણી ચાલી રહી હતી ત્યારે જ રાજસ્થાનના બે પિતરાઈ ભાઈઓએ ટ્રેન નીચે ઝંપલાવીને આપઘાત કરી લીધો છે. એવી માહિતી મળી છે કે બંને ભાઈએ એક જ યુવતીના પ્રેમમાં હતા. બંને પોતાના હાથ પર યુવતીનું નામ લખીને ટ્રેન સામે કૂદી ગયા હતા.

આ બનાવ રાજસ્થાનના બુન્દી જિલ્લામાં બન્યો હતો. પોલીસે એવી આશંકા વ્યક્ત કરી છે કે બંને ભાઈઓ કોઈ એક જ છોકરીના પ્રેમમાં હતા. મૃતક મહેન્દ્ર ગુર્જર (ઉં.વ.૨૩) અને દેવરાજ ગુર્જર (ઉં.વ.૨૩) બુન્દી જિલ્લાના કેશવપુરા ગામ ખાતે રહેતા હતા. આ બનાવ રવિવારે વહેલી સવારે ગુડલા ગામ ખાતે બન્યો હતો.

સ્ટેશન હાઉસ ઓફિસરે જણાવ્યું હતું કે, બંને પિતાઈ ભાઈઓના હાથ પર “આશા” લખેલું હતું. બંનેનાં મોબાઇલ ફોનમાંથી જે તસવીરો અને વિગતો મળી છે તેના પરથી પોલીસે એવું તારણ કાઢ્યું છે કે બંને એક જ યુવતીને પ્રેમ કરતા હતા. આ યુવતી કોણ છે અને ક્યાં રહે છે તેની વિગતો પોલીસ મેળવી શકી નથી.

એસએચઓએ જણાવ્યું હતું કે, પ્રાથમિક તપાસમાં એવી વિગત સામે આવી છે કે આપઘાત કરી લેનાર બંને પિતરાઈ ભાઈ છે. અકસ્માત સ્થળેથી સુસાઇડ નોટ મળી આવી નથી. પોલીસે તમામ પ્રક્રિયા પૂર્ણ કર્યા બાદ મૃતદેહોને તેમના પરિવારને સોંપી દીધા છે. પોલીસે આ મામલે સીઆરપીસીની કલમ ૧૭૪ હેઠળ ગુનો દાખલ કર્યો છે.

એવી પણ માહિતી મળી છે આપઘાત પહેલા બંને ભાઈઓે એક વીડિયો પોસ્ટ કર્યો હતો. જેમાં બંનેએ જણાવ્યું હતું કે, હવે જીવવાની ઇચ્છા નથી. અમારા ગયા બાદ તમે કોઈ સાથે ઝઘડો કરશો નહીં. આવું કરશો તો અમારી આત્માને શાંતિ નહીં મળે. ક્યારેક તો જવાનું જ હતું, દુઃખી ન થતાં.

પોલીસ તપાસમાં સામે આવ્યું છે કે એક પિતરાઈ બુન્દીમાં રહીને અભ્યાસ કરતો હતો, જ્યારે બીજાે કામ કરતો હતો. આ બનાવ દિલ્હી-મુંબઈ રેલવે લાઇન પર બની હતી. નજીકથી પોલીસને એક બાઇક પણ મળી આવ્યું છે. બંનેના મૃતદેહ ક્ષત-વિક્ષત હાલતમાં મળ્યા હતા. ટ્રેનની ટક્કર બાદ એકનું માથું ધડથી અલગ થઈ ગયું હતું. આ દરમિયાન બંનેને એક વીડિયો પણ વાયરલ થઈ રહ્યો છે.