વાસણામાં તસ્કરોએ જ્વેલર્સની દુકાનમાંથી લાખોની ચોરી કરી
અમદાવાદ: એક તરફ કોરોનાના કારણે લોકો આર્થિક સંકળામણ અનુભવી રહ્યા છે ત્યારે બીજી તરફ ચોરી અને લૂંટની ઘટનાઓ વધી રહી છે. આવી જ એક ઘટના બની છે કે જેમાં અમદાવાદ શહેરના વાસણા વિસ્તારમાં સીડીમાં બાકોરું પાડીને બે દુકાનમાં લાખોની લૂંટ કરવામાં આવી છે. જેમાં એક જ્વેલર્સની જ્યારે એક વાસણની દુકાન હોવાનું પ્રાથમિક વિગતોમાં જાણવા મળી રહ્યું છે. આ બનાવ અંગે વાસણા પોલીસ દ્વારા તપાસ શરુ કરવામાં આવી હોવાનું સ્થાનિક મીડિયા રિપોર્ટ્સમાં જણાવવામાં આવી રહ્યું છે. વાસણા વિસ્તારમાં આવેલા ચામુંડા જ્વેલર્સ સહિત અન્ય દુકાનમાં સીડીમાં બાકોરું પાડીને લાખોના સોના-ચાંદીના દાગીનાની ચોરી થઈ હોવાની ઘટનાને લઈને તપાસનો ધમધમાટ શરુ કરવામાં આવ્યો છે.
જ્વેલર્સ અને તેની બહારની બાજુએ આવેલી સીડીની દિવાલ તોડીને તસ્કરો અંદર ઘૂસ્યા અને સોના-ચાંદીના દાગીનાની ચોરી કરી છે. ચોરી થયેલા દાગીનામાં મોટા ભાગે ચાંદીની વસ્તુ હતી જાેકે, કુલ કેટલા રૂપિયાની ચોરી થઈ છે તે અંગે ગણતરી કરવામાં આવી રહી છે. ચામુંડા જ્વેલર્સના માલિકે એક અંદાજ લગાવ્યો છે કે લગભગ સાત કિલો જેટલી ચાંદીની ચોરી થઈ છે. જે ડિસ્પ્લેમાં મૂકવામાં આવી હતી. ચામુંડા જ્વેલર્સમાં સીડીમાં બાકોરું પાડીને ઘૂસેલા તસ્કરોએ દુકાનમાં ડિસ્પ્લેમાં જે ઘરેણા મૂકેલા હોય તેની ચોરી કરી લીધી છે. તસ્કરોએ શો-કેસમાં પડેલા ઘરેણાંની ચોરી કરીને તેના બોક્સ ત્યાં જ ફેંકી દીધા હતા. આ શો-કેસમાં મૂકવામાં આવેલા ઘરેણા મોટાભાગે ચાંદીના હોવાની વિગતો સામે આવી રહી છે.
જ્વેલર્સના માલિકને પોતાની સોના-ચાંદીની દુકાનમાં ચોરી થઈ હોવાની માહિતી મળતા તેમણે આ ઘટના અંગે વાસણા પોલીસને જાણ કરી છે. દુકાનના માલિક દ્વારા પોલીસને જાણ કરવામાં આવી છે પરંતુ તેમણે આ ઘટનામાં કોઈ જાણભેદું હોવાની શંકાઓ વ્યક્ત કરવાનો ઈનકાર કર્યો છે. બીજી તરફ પોલીસ દ્વારા સીસીટીવી ફૂટેજ સહિત અલગ-અલગ રીતે તસ્કરોને ઝડપી પાડવા માટે કાર્યવાહી કરાઈ રહી છે. જાેકે, જ્વેલર્સની દુકાનમાં લાગેલા સીસીટીવી કેમેરાની ડીવીઆર તસ્કરો પોતાની સાથે લઈ ગયા છે. પરંતુ જે રીતે દિવાલમાં બાકોરું પાડવામાં આવ્યું છે અને ચોરીને અંજામ આપવામાં આવ્યો છે તે જાેતા આ ઘટના કોઈ જાણભેદુંની હોવાની સંભાવના છે. જાેકે, માલિક દ્વારા સ્થાનિક મીડિયા સાથે કરેલી વાતચીતમાં આ અંગે કોઈ શંકા વ્યક્ત નથી કરાઈ.
