યુએન મહેતા હોસ્પિટલની નર્સને ડિજિટલ એરેસ્ટ કરી સાયબર ગઠિયાએ ૧.૩૧ લાખ પડાવી લીધા

અમદાવાદ, શાહીબાગની નર્સને વિદેશ જવાની ઇન્સ્ટાગ્રામની લીંક પર ક્લીક કરવી ભારે પડી હોવાનો ચોંકાવનારો કિસ્સો સામે આવ્યો છે.

યુએન મહેતા હોસ્પિટલની નર્સને ડિજિટલ એરેસ્ટ કરી ગઠિયાઓએ રૂ. ૧.૩૧ લાખ પડાવી લીધા છે. ગઠિયાઓએ પાર્સલના ટેક્સ, સીબીઆઇ અને પોલીસના નામે ઓનલાઇન પૈસા મેળવ્યા હતા. આ મામલે યુવતીએ શાહીબાગ પોલીસ મથકમાં ફરિયાદ નોંધાવી છે.

શાહીબાગ વિસ્તારમાં ૨૪ વર્ષીય સોનલ ડામોર પરિવાર સાથે રહે છે અને સિવિલ હોસ્પિટલ કેમ્પસમાં યુએન મહેતા હોસ્પિટલમાં નર્સ તરીકે ફરજ બજાવે છે. તે દાહોદમાં બેંક ઓફ બરોડા લીમડી શાખામાં સેવિંગ્સ એકાઉન્ટ ધરાવે છે.

૧ ઓક્ટોબરે સોનલ ઘરે હતી અને ઇન્સ્ટાગ્રામ પર રીલ જોતી હતી ત્યારે અચાનક જ યુનાઇટેડ કિંગડમ એબ્રોડ જવા માટેની એક જાહેરાત આવી હતી. સોનલને એબ્રોડ જવાનો વિચાર હતો તેથી તેણે જાહેરાત પર ક્લીક કરી ત્યારે વોટ્‌સએપ પર એપ્લિકેશન ખુલી હતી અને તેમાં ડોક્યુમેન્ટની માગણી કરવામાં આવી હતી.

સોનલે જણાવ્યું હતું કે, પરિવાર સાથે ચર્ચા કરી ડોક્યુમેન્ટ મોકલીશ. એક અવાડિયા બાદ જે વોટ્‌સ એપ પરથી સોનલને મેસેજ આવ્યો તે નંબર પર તેણે મેસેજ કરી વિદેશ જવા ઇનકાર કરી દીધો હતો. ૬ ઓક્ટોબરે અજાણ્યા નંબરથી મેસેજ આવ્યો હતો અને તેણે એકપાર્સલ મોકલ્યું છે જે ઘરે આવી જશે તેમ કહ્યું હતું.

સોનલે મારે કોઇ જ પાર્સલ જોઇતું નથી તેવો મેસેજ કર્યાે હતો. ૭ ઓક્ટોબરે અજાણ્યા વોટ્‌સ એપ નંબરથી કોલ આવ્યો હતો અને સામેવાળી વ્યક્તિએ દિલ્હી એરપોર્ટ પોલીસમાંથી બોલુ છું તમારા પાર્સલમાં કિંમતી વસ્તુઓ છે જેમાં આઇફોન, વોચ, ૬૦૦ પાઉન્ડ, ડાયમંડ રિંગ, એપલ ઇયરબર્ડ સહિતની વસ્તુઓ છે આ પાર્સલ જોઇતું હોય તો ૨૨ હજાર ટેક્સ ભરવો પડશે.

જો કે, સોનલે પાર્સલ લેવાનો ઇનકાર કરી દીધો હતો. પછી પાછો ફોન આવ્યો હતો અને ટેક્સ ભરવો જ પડશે જો નહીં ભરો તો પોલીસ પકડી લેશે. આવા ડરને કારણે સોનલે ૨૨ હજાર મોકલી આપ્યા હતા. ૮ ઓક્ટોબરે ફરી વોટ્‌સ એપ પર સીબીઆઇમાંથી બોલુ છું તમારું જે પાર્સલ મંગાવ્યું હતું તેના ટેક્સ પેટે ૩૨ હજાર ભરવા પડશે. જેથી બીજા ૩૨ હજાર મોકલ્યા હતા અને પછી બીજા ૭ હજાર પણ મોકલ્યા હતા.

પછી અજાણ્યા નંબરથી ફોન આવ્યો હતો અને જણાવ્યું હતું કે, હું દિલ્હી એરપોર્ટ પરથી પાર્સલ લઇ તમને અમદાવાદ આપી જઇશ. પરંતુ તે માટે તમારે તમારું આધાર કાર્ડ આપવું પડશે અને ૪૭ હજાર મોકલવા પડશે. જો પૈસા નહીં મોકલો તો મને અને તમને બન્નેને જેલમાં પૂરી દેશે.

તેથી સોનલે ફરી ૪૭ હજાર ઓનલાઇન મોકલી દીધા હતા. ૯ ઓક્ટોબરે ફરી વોટ્‌સ એપ કોલ કર્યાે હતો અને એટીએમ બ્લોક થઇ ગયું હોવાથી ટિકિટ કરાવવા ૨૩ હજાર માગતા ફરી સોનલે ૨૩ હજાર ટ્રાન્સફર કર્યા હતા. આવી રીતે વાંરવાર દિલ્હી પોલીસ સહિતના નામે રૂ. ૧.૩૧ લાખ પડાવી લીધા હતા. બાદમાં સોનલને ઠગાયાનો અહેસાસ થતા તેણે ઓનલાઇન ફરિયાદ કરી હતી. ત્યારબાદ આ મામલે શાહીબાગ પોલીસે ફરિયાદ નોંધી છે.SS1MS