APMC માર્કેટમાંથી 14 કોથળા લસણની ચોરી થઇ
(એજન્સી)અમદાવાદ, લસણના ભાવમાં વધારો થતાં ચોરોએ વિશાલા સર્કલ પાસે આવેલી એગ્રિકલ્ચર પ્રોડ્યુસ એન્ડ માર્કેટ કમિટી (એપીએમસી)ને નિશાન બનાવીને ત્યાંથી ૧૪૦ કિલો લસણના ૧૪ કોથળા ચોરીને રવાના થઈ ગયા હતા.
વાસણાના ૩૯ વર્ષીય ગોવિંદ સાવંસાએ વેજલપુર પોલીસમાં પોતાની એફઆઈઆરમાં જણાવ્યું હતું કે, તે ડુંગળી અને લસણના જથ્થાબંધ વેચાણનો ધંધો કરે છે. શનિવારે સવારે લગભગ ૯ વાગે તેઓ મધ્ય પ્રદેશથી લસણની ૧૦૫ બોરીઓ ખરીદી હતી.
શનિવારે રાત્રે આઠ વાગ્યાની આસપાસ સાવંસાને લસણની બોરીઓ જમાલપુર માર્કેટમાં લઈ જવાની હતી અને તેના કર્મચારીઓ રિક્ષામાં બોરીઓ ભરીને જતા હતા ત્યારે તેને ૧૪ બોરી ગાયબ જોવા મળી હતી.
સાવંસાએ જણાવ્યું હતું કે, તેણે એપીએમસીમાં તેની દુકાનની આસપાસ તે બોરીઓ શોધવાનો પ્રયાસ કર્યો હતો પરંતુ મળી નહોતી. બાદમાં સીસીટીવી ફૂટેજ ચેક કરતાં જાણવા મળ્યું હતું કે, શનિવારે સાંજે સાડા છ વાગ્યે બે શખ્સોએ ચોરી કરી હતી.
ભાવ વઘતા ચોરોએ ઉઠાવી 14 બોરી લસણ, ઘટના અમદાવાદની #Ahmedabad #Garlic #cctv pic.twitter.com/dJiwnUAAE9
— DINESH CHAUDHARY (@dinesh9904748) February 5, 2024
સીસીટીવી ફૂટેજમાં જોવા મળ્યું હતું કે એપીએમસીમાં સાવંસાની દુકાન પર બે શખ્સો આવ્યા હતા, લસણની ૧૪ બોરીઓ ઉપાડી, શાંતિથી તેમને એક ઓટોરિક્ષાની અંદર મૂકી દીધા હતા, જેમાં તેઓ આવ્યા હતા અને બે મિનિટમાં ત્યાંથી ભાગી ગયા હતા. સાવંસાએ શહેર પોલીસ કંટ્રોલ રૂમમાં ફોન કર્યો હતો અને બાદમાં બે અજાણ્યા શખ્સો સામે ચોરીની ફરિયાદ નોંધાવી હતી.એપીએમસીના સૂત્રોએ જણાવ્યું હતું કે છૂટક બજારમાં લસણના જથ્થાબંધ ભાવ ૨૫૦ થી ૩૦૦ રૂપિયા પ્રતિ કિલો અને ૪૫૦થી ૫૦૦ રૂપિયા પ્રતિ કિલોની વચ્ચે છે.
વેજલપુર પોલીસે સીસીટીવી ફૂટેજના આધારે તપાસ શરૂ કરી હતી. એક પોલીસ અધિકારીએ જણાવ્યું હતું કે, “અમે ઓટોરિક્ષા નંબર પરથી આરોપીઓની ઓળખ કરવાનો પ્રયાસ કરી રહ્યા છીએ. પ્રતિકૂળ હવામાનની સ્થિતિને કારણે નબળા પાકને કારણે લસણના ભાવમાં લગભગ એક મહિનાથી વધારો થઈ રહ્યો છે. ગુજરાત, મહારાષ્ટ્ર અને મધ્યપ્રદેશ દેશમાં લસણના મોટા ઉત્પાદક છે.
