કંપારી છૂટી જાય તેવી દેશની ૮ સૌથી ભયાનક રેલ દુર્ઘટના

નવી દિલ્હી, ઓડિશામાં શુક્રવારે થયેલી ભયાનક ટ્રેન દુર્ઘટનામાં ૨૩૩ લોકોના મોત થયા છે અને ૯૦૦થી વધુ લોકો ઘાયલ થયા છે. આ દુર્ઘટનામાં બેંગલુરુ-હાવડા સુપરફાસ્ટ એક્સપ્રેસ, શાલીમાર-ચેન્નઈ સેન્ટ્રલ કોરોમંડલ એક્સપ્રેસ અને માલગાડી પાટા પરથી ઉતરી ગઈ હતી અને ટકરાઈ હતી. ડેટા દર્શાવે છે કે કોરોમંડલ એક્સપ્રેસ ટ્રેનનું પાટા પરથી ઉતરવું એ આઝાદી પછી દેશમાં સૌથી ભયંકર અકસ્માતોમાંથી એક છે.

ઓડિશાના બાલાસોરમાં ભયાનક ટ્રેન દુર્ઘટના બાદ ગોવા-મુંબઈ વંદે ભારત એક્સપ્રેસનો સમારોહ રદ કરવામાં આવ્યો છે. ઓડિશાના મુખ્યમંત્રી નવીન પટનાયકે ટ્રેન દુર્ઘટના બાદ એક દિવસનો રાજ્ય શોકનો આદેશ આપ્યો છે. ૬ જૂન, ૧૯૮૧ના રોજ બિહારમાં ભારતનો સૌથી ખરાબ ટ્રેન અકસ્માત નોંધાયો હતો.

જ્યારે પુલ પરથી પસાર થતી વખતે એક ટ્રેન બાગમતી નદીમાં પડી હતી, જેમાં ૭૫૦થી વધુ લોકોના મોત થયા હતા. ૨૦ ઓગસ્ટ ૧૯૯૫ના રોજ પુરુષોત્તમ એક્સપ્રેસ ફિરોઝાબાદ પાસે પાટા પર ઉભેલી કાલિંદી એક્સપ્રેસ સાથે અથડાઈ હતી.

આમાં સત્તાવાર મૃત્યુઆંક ૩૦૫ આસપાસ હતો. ૨૬ નવેમ્બર ૧૯૯૮ના રોજ, જમ્મુ તાવી-સિયાલદાહ એક્સપ્રેસ પંજાબના ખન્ના ખાતે ફ્રન્ટીયર ગોલ્ડન ટેમ્પલ મેઈલના ત્રણ પાટા પરથી ઉતરી ગયેલા કોચ સાથે અથડાઈ હતી, જેમાં ૨૧૨ લોકોના મોત થયા હતા. ૨ ઓગસ્ટ, ૧૯૯૯ના રોજ ગેસલ ટ્રેન દુર્ઘટના ત્યારે થઈ જ્યારે બ્રહ્મપુત્રા મેલ ઉત્તર સરહદ રેલ્વેના કટિહાર વિભાગના ગેસલ સ્ટેશન પર ઉભેલી અવધ-આસામ એક્સપ્રેસ સાથે અથડાઈ.

જેમાં ૨૮૫થી વધુ લોકોના મોત થયા હતા અને ૩૦૦થી વધુ લોકો ઘાયલ થયા હતા. દુર્ઘટનાનો ભોગ બનેલા લોકોમાં ઘણા આર્મી, બીએસએફ અથવા સીઆરપીએફના જવાનો હતા. ૨૦ નવેમ્બર, ૨૦૧૬ના રોજ પુખરાયનમાં એક ટ્રેન પાટા પરથી ઉતરી ગઈ હતી. કાનપુરથી લગભગ ૬૦ કિલોમીટર દૂર પુખરાયન ખાતે ઈન્દોર-રાજેન્દ્ર નગર એક્સપ્રેસના ૧૪ ડબ્બા પાટા પરથી ઉતરી ગયા હતા. જેમાં ૧૫૨ લોકોના મોત થયા હતા અને ૨૬૦ લોકો ઘાયલ થયા હતા.

૯ સપ્ટેમ્બર ૨૦૦૨ના રોજ, ધવા નદી પરનો પુલ તૂટવાને લીધે હાવડા રાજધાની એક્સપ્રેસ રફીગંજ ખાતે પાટા પરથી ઉતરી ગઈ હતી. જેના કારણે રફીગંજ ટ્રેન દુર્ઘટના થઈ હતી, જેમાં ૧૪૦થી વધુ લોકોના મોત થયા હતા. આ ઘટના માટે આતંકવાદી તોડફોડને જવાબદાર ઠેરવવામાં આવી હતી.

૨૩ ડિસેમ્બર, ૧૯૬૪ના રોજ રામેશ્વરમ ચક્રવાતમાં પમ્બન-ધનુષકોડી પેસેન્જર ટ્રેન ધોવાઈ ગઈ હતી. જેના કારણે તેમાં સવાર ૧૨૬થી વધુ મુસાફરોના મોત થયા હતા. ૨૮ મે ૨૦૧૦ના રોજ જનેશ્વરી એક્સપ્રેસ ટ્રેન પાટા પરથી ઉતરી જવાની ઘટના બની હતી. મુંબઈ જતી ટ્રેન ઝારગ્રામ નજીક પાટા પરથી ઉતરી ગઈ હતી અને પછી માલગાડી સાથે અથડાઈ હતી, જેમાં ૧૪૮ મુસાફરોના મોત થયા હતા.SS1MS