રાહુલ ગાંધીને કોંગ્રેસ અધ્યક્ષ બનાવવામાં આવે અશોક ગેહલોત
નવીદિલ્હી, કોંગ્રેસ વર્કિંગ કમિટીની બેઠકમાં રાજસ્થાનના મુખ્યમંત્રી અશોક ગેહલોતે રાહુલ ગાંધીને કોંગ્રેસ અધ્યક્ષ બનાવવાનો પ્રસ્તાવ મૂક્યો છે. સૂત્રોના જણાવ્યા અનુસાર, અશોક ગેહલોતે સીડબ્લ્યુસી બેઠકમાં પ્રસ્તાવ મૂક્યો હતો કે રાહુલ ગાંધીએ કોંગ્રેસનું નેતૃત્વ કરવું જાેઈએ, જેને સીડબ્લ્યુસીના તમામ સભ્યોનું સમર્થન પણ મળ્યું હતું. અત્યારે સોનિયા ગાંધી દેશની સૌથી જૂની પાર્ટીના વચગાળાના અધ્યક્ષ છે.
૨૦૧૭ માં રાહુલ ગાંધીએ કોંગ્રેસ અધ્યક્ષ પદ સંભાળ્યું. પરંતુ ૨૦૧૯ માં લોકસભા ચૂંટણીમાં કોંગ્રેસની હાર બાદ તેમણે આ પદ છોડી દીધું હતું. વાયનાડના સાંસદ રાહુલના રાજીનામા બાદ કોંગ્રેસની અંદર હંગામો મચી ગયો હતો. કોંગ્રેસના વરિષ્ઠ નેતાઓએ પણ રાહુલને મનાવવાનો પ્રયાસ કર્યો, પરંતુ નિષ્ફળ રહ્યા. આ પછી, ૧૯ વર્ષ સુધી કોંગ્રેસનું નેતૃત્વ કરનાર સોનિયા ગાંધી વચગાળાના પ્રમુખ તરીકે પાછા ફરવા સંમત થયા.
તે જ સમયે, આ પહેલી વાર નથી, જ્યારે રાજસ્થાનના મુખ્યમંત્રી ગેહલોતે રાહુલ ગાંધીને કોંગ્રેસ અધ્યક્ષ બનાવવાની માંગ કરી હોય. અગાઉ, ગયા વર્ષે જૂનમાં યોજાયેલી સીડબ્લ્યુસી બેઠકમાં ગેહલોતે રાહુલને પ્રમુખ બનાવવાની માંગ પણ કરી હતી. ગેહલોતે કહ્યું હતું કે હવે સમય આવી ગયો છે કે રાહુલ ફરી એક વખત સંગઠનની કમાન સંભાળી લે. તેમને આ સમયગાળા દરમિયાન ઉત્તરાખંડના પૂર્વ મુખ્યમંત્રી અને કોંગ્રેસના વરિષ્ઠ નેતા હરીશ રાવતનું સમર્થન પણ મળ્યું. જાેકે, અન્ય વરિષ્ઠ નેતાઓએ તેના પર કોઈ ટિપ્પણી કરી નથી.HS
