પાક સરકાર જમાત-એ-ઈસ્લામીના ૩૫ સભ્યોને મુક્ત કરશે
ઈસ્લામાબાદ, પાકિસ્તાન સરકારે રવિવારે જમાત-એ-ઈસ્લામીના ૩૫ અટકાયત સભ્યોને મુક્ત કરવાની જાહેરાત કરી હતી. સરકારના આ નિર્ણય પાછળનો હેતુ જમણેરી ઇસ્લામિક પાર્ટીને આકાશને આંબી રહેલા વીજળીના બિલ અને વધતા ટેક્સ સામેના વિરોધને સમાપ્ત કરવા માટે સમજાવવાનો છે.
સમાચાર એજન્સી પીટીઆઈના અહેવાલ મુજબ, સરકારે જમાત-એ-ઈસ્લામીની માંગણીઓ પર ધ્યાન આપવા માટે એક તકનીકી સમિતિની પણ રચના કરી છે.
જમાત-એ-ઈસ્લામી વીજળી અને કર વધારાના મુદ્દાઓ પર રાવલપિંડીના ગેરિસન સિટીમાં મુરી રોડ પર લિયાકત બાગ વિસ્તારમાં વિરોધ પ્રદર્શન કરી રહી છે.
માહિતી મંત્રી અતાઉલ્લા તરારે કહ્યું કે, ત્નૈં સાથેની વાતચીતના પ્રથમ રાઉન્ડ બાદ સરકાર પાર્ટીની માંગ પ્રમાણે તેના ૩૫ સમર્થકોને મુક્ત કરી રહી છે.
તેમણે કહ્યું કે સરકાર જેઆઈ પ્રતિનિધિમંડળ દ્વારા રજૂ કરવામાં આવેલી માંગણીઓ માટે પહેલાથી જ સંમત થઈ ગઈ છે કારણ કે તે જનતા પરનો બોજ ઘટાડવા માટે પ્રતિબદ્ધ છે.ડેપ્યુટી ચીફ લિયાકત બલોચના નેતૃત્વમાં જેઆઈ પ્રતિનિધિમંડળ સાથેની બેઠક બાદ તરારએ આ જાહેરાત કરી હતી.
જમાત-એ-ઈસ્લામી સાથે વાતચીત માટેના સરકારી પ્રતિનિધિમંડળમાં અતાઉલ્લાહ તરાર, કાશ્મીર બાબતોના મંત્રી ઈજનેર અમીર મકમ, પીએમએલ-એનના વરિષ્ઠ નેતા તારિક ફઝલ ચૌધરી અને વડાપ્રધાનના મીડિયા સંયોજક બદર શાહબાઝનો સમાવેશ થાય છે.
તરારએ કહ્યું કે જેઆઈએ દસ માંગણીઓની યાદી રજૂ કરી, જેમાંથી મોટાભાગની માંગણીઓ પાવર સંબંધિત મુદ્દાઓ સાથે સંબંધિત છે.તેમણે કહ્યું કે એક ટેકનિકલ કમિટીની રચના કરવામાં આવી છે, જેમાં પાણી અને ઉર્જા મંત્રાલય, ઉર્જા સચિવ, એફબીઆર અને નાણાં મંત્રાલયના પ્રતિનિધિઓનો સમાવેશ થાય છે. આ કમિટી જનતાને કેવી રીતે રાહત આપી શકાય તે અંગે સરકારને જરૂરી સૂચનો આપશે.
અગાઉ, વિરોધ પ્રદર્શનને સંબોધિત કરતી વખતે, જેઆઈ ચીફ હાફિઝ નઈમે કહ્યું કે કોઈ પણ પોતાનું ઘર છોડીને રસ્તા પર બેસવા માંગતું નથી. અમે દેશના ભવિષ્ય માટે બહાર આવ્યા છીએ અને જ્યાં સુધી અમારી માંગણીઓ સંતોષવામાં નહીં આવે ત્યાં સુધી આંદોલન ચાલુ રાખીશું.SS1MS
