શેખ હસીના વિરુદ્ધ સરઘસ પર હુમલાનો આરોપ
ઢાકા, બુધવારે બાંગ્લાદેશના ભૂતપૂર્વ વડા પ્રધાન શેખ હસીના અને અન્ય ૮૬ લોકો વિરુદ્ધ સિલ્હેટ શહેરમાં એક સરઘસ પર હુમલો કરવા બદલ કેસ નોંધવામાં આવ્યો હતો, જેમાં ઘણા લોકોને ગોળી વાગી હતી અને મોટી સંખ્યામાં ઘાયલ થયા હતા. આ હુમલો ૪ ઓગસ્ટના રોજ થયેલા ભારે વિરોધ દરમિયાન થયો હતો.
તેમની હકાલપટ્ટી બાદ હવે શેખ હસીના સામે નોંધાયેલા કેસોની સંખ્યા વધીને ૩૩ થઈ ગઈ છે.જાતિયતાબાદી છાત્ર દળના સિલ્હેટ શહેર એકમના કાર્યકારી પ્રમુખ ઝુબેર અહેમદે સિલહટ મેટ્રોપોલિટન મેજિસ્ટ્રેટ સુમન ભુઈયાની કોર્ટમાં કેસ દાખલ કર્યો છે.
આ કેસમાં હસીનાની બહેન શેખ રેહાના પણ આરોપી છે.ડેઈલી સ્ટાર અખબાર અનુસાર, કેસમાં આરોપ લગાવવામાં આવ્યો છે કે આરોપીઓએ ૪ ઓગસ્ટના રોજ સિલ્હેટ શહેરના બંદરબજાર વિસ્તારમાં બાંગ્લાદેશ નેશનાલિસ્ટ પાર્ટી અને તેની સાથે જોડાયેલા સંગઠનો દ્વારા આયોજિત એક શાંતિપૂર્ણ રેલી પર હુમલો કર્યો હતો, જેમાં ઘણા લોકો ઘાયલ થયા હતા.
આ મામલામાં અવામી લીગના જનરલ સેક્રેટરી અને ભૂતપૂર્વ રોડ ટ્રાન્સપોર્ટ મિનિસ્ટર ઓબેદુલ કાદર, ભૂતપૂર્વ ગૃહ પ્રધાન અસદુઝમાન ખાન, ભૂતપૂર્વ વિદેશ પ્રધાન હસન મહમૂદ, ભૂતપૂર્વ કાયદા પ્રધાન અનીસુર રહેમાન અને વડા પ્રધાનના ભૂતપૂર્વ સલાહકાર સલમાન એફ રહેમાનના નામ સામેલ છે.
રિપોર્ટ અનુસાર, આ કેસ સાથે, હસીના હવે તેની સામે ૩૩ કેસનો સામનો કરી રહી છે. જેમાં હત્યાના ૨૭ કેસ, માનવતા અને નરસંહારના ચાર કેસ અને અપહરણના એક કેસનો સમાવેશ થાય છે.
શેખ હસીના ૫ ઓગસ્ટે સરકાર વિરોધી વિદ્યાર્થીઓની આગેવાની હેઠળના ભારે વિરોધ વચ્ચે તેમના પદ પરથી રાજીનામું આપ્યા બાદ ભારત ભાગી ગયા હતા. હવે બાંગ્લાદેશમાં વચગાળાની સરકાર છે જેનું નેતૃત્વ ૮૪ વર્ષના નોબેલ પુરસ્કાર વિજેતા મુહમ્મદ યુનુસ કરી રહ્યા છે.
બાંગ્લાદેશની વચગાળાની સરકારે કહ્યું છે કે તે હસીનાની આગેવાની હેઠળની સરકાર વિરુદ્ધ વિદ્યાર્થીઓના તાજેતરના જન આંદોલન દરમિયાન હત્યામાં સામેલ લોકો સામે આંતરરાષ્ટ્રીય અપરાધ ટ્રિબ્યુનલમાં કાર્યવાહી કરશે.
બાંગ્લાદેશમાં હસીના સરકારના પતન પછી દેશભરમાં ફાટી નીકળેલી હિંસાની ઘટનાઓમાં ૨૩૦ થી વધુ લોકો માર્યા ગયા હતા. સરકારી નોકરીઓમાં વિવાદાસ્પદ ક્વોટા સિસ્ટમ સામે જુલાઈના મધ્યમાં વિદ્યાર્થીઓ દ્વારા મોટા પાયે વિરોધ શરૂ થયો ત્યારથી મૃત્યુઆંક ૬૦૦ને પાર કરી ગયો છે.SS1MS
