કોરોના-મંકીપોક્સ બાદ હવે નવા વાયરસનો ‘આતંક’
નવી દિલ્હી, વર્ષ ૨૦૨૦ થી, સમગ્ર વિશ્વ કોવિડ -૧૯ રોગચાળાનો સામનો કરી રહ્યું છે. અત્યાર સુધી આ વાયરસે ૭૦ કરોડથી વધુ લોકોને પોતાનો શિકાર બનાવ્યા છે. કોરોનાવાયરસ પછી, મંકીપોક્સના દર્દીઓની સંખ્યામાં પણ વૈશ્વિક સ્તરે વધારો જોવા મળ્યો છે.
મંકીપોક્સ આ દિવસોમાં સ્વાસ્થ્ય માટે એક મોટું જોખમ છે. તાજેતરની માહિતી અનુસાર, ભારતમાં અત્યાર સુધીમાં ત્રણ દર્દીઓ નોંધાયા છે. કોરોના અને મંકીપોક્સના સતત જોખમો વચ્ચે હવે એક નવો ચેપી રોગ આરોગ્ય નિષ્ણાતો માટે ચિંતા વધારી રહ્યો છે.
આ દિવસોમાં, પૂર્વ આળિકન દેશ રવાંડામાં મારબર્ગ વાયરસનો પ્રકોપ જોવા મળી રહ્યો છે. અહીં અત્યાર સુધીમાં ૨૬ કેસની પુષ્ટિ થઈ છે અને તેના કારણે છ લોકોના મોત પણ થયા છે. વર્લ્ડ હેલ્થ ઓર્ગેનાઈઝેશનના રિપોર્ટ અનુસાર, દેશના ૩૦ માંથી સાત જિલ્લામાં વાયરસના કેસ નોંધાયા છે.
૨૬માંથી ૨૦ કેસ ગંભીર છે અને તેઓ આઇસોલેશનમાં છે. સંક્રમિત લોકોના સંપર્કમાં આવેલા લગભગ ૧૬૦ લોકો પર નજર રાખવામાં આવી રહી છે. મારબર્ગ વાયરસ ઘણા કિસ્સાઓમાં પડકારરૂપ હોવાનું કહેવાય છે, તેનો મૃત્યુદર ૮૮% સુધી છે જે નિષ્ણાતો માટે સૌથી મોટી ચિંતાનો વિષય છે.
આ વાયરસ ઇબોલા પરિવારનો હોવાનું માનવામાં આવે છે, જેના કેસ અગાઉ પણ નોંધાયા છે. કોરોનાવાયરસની જેમ, તે ચામાચીડિયાથી માણસોમાં પણ ફેલાય છે. ચેપગ્રસ્ત વ્યક્તિઓના શરીરના પ્રવાહીના સંપર્કમાં આવવાને કારણે તે એક વ્યક્તિથી બીજી વ્યક્તિમાં ફેલાવાનું જોખમ રહેલું છે.
હુએ દરેકને અપીલ કરી છે કે તેઓ વાયરસને રોકવા અને સંક્રમિતોમાં તેની ગૂંચવણો ઘટાડવાના પ્રયાસોને લઈને સાવચેત રહે. નિષ્ણાતોએ કહ્યું કે, ક્લિનિકલ કેર અને ચેપ નિવારણ અને નિયંત્રણ પર ગંભીર ધ્યાન આપવું જોઈએ.વર્લ્ડ હેલ્થ ઓર્ગેનાઈઝેશનના જણાવ્યા અનુસાર, આ વાયરસ માટે ન તો કોઈ ચોક્કસ સારવાર છે અને ન તો તેને રોકવા માટે કોઈ રસી છે.
દવાઓ અને ઇમ્યુનોથેરાપીની શ્રેણી વિકસાવવામાં આવી રહી છે. રવાંડાના આરોગ્ય મંત્રાલયનું કહેવું છે કે અમે ચેપના ફેલાવાને રોકવા માટેના પગલાં સાથે સંપર્ક ટ્રેસિંગ અને પરીક્ષણ વધારી રહ્યા છીએ. ચેપને રોકવા માટે, લોકોને સામાજિક અંતરનું પાલન કરવાનું ચાલુ રાખવાની સલાહ આપવામાં આવી છે.SS1MS
