સુરતમાં ઓવરબ્રિજ ઉપરથી મોપેડ સાથે બે યુવાન પટકાયા

સુરત, ગઈકાલે મોડીરાતે સુરતના કતારગામ વિસ્તારમાં ઓવરબ્રિજ ઉપરથી મોપેડ લઈને જઈ રહેલા બે યુવાનો મોપેડ સાથે ૩૦ ફૂટ ઉપરથી બ્રીજ નીચે પટકાયા હતાં.

એકનું ઘટના સ્થળે જ મોત નીપજ્યું હતું. બીજાની હાલત કટોકટ છે. બેફામ સ્પીડમાં જતી વખતે મોપેડનું સ્ટિયરિંગ હાથમાંથી છૂટી ગયું હતું અને બ્રીજની રેલિંગ સાથે અથડાઈને બંને નીચે પટકાયા હતા. મોપેડની પાછળ બેઠેલો યુવક સાજિદ હુસૈન સૈયદનું ઘટનાસ્થળે જ મોત નીપજ્યું હતું અને ચાલક યુસુફ ઇમરાન શાહની હાલત ગંભીર છે.

આ અકસ્માતના સીસીટીવી પણ સામે આવતા લોકો પણ ચોંકી ઉઠ્યા હતાં.ઘટનાના બહાર આવેલા સીસીટીવીમાં દેખાતાં દૃશ્યો મુજબ શહેરના કતારગામ દરવાજા વિસ્તારમાં ઓવરબ્રિજ પરથી મોપેડ ઉપર બે યુવક પસાર થઈ રહ્યાં હતા. મોપેડ ચાલક ઓવરબ્રિજ પર બેફામ સ્પીડમાં જઈ રહ્યો હતો, એક હાથ સ્ટિયરિંગથી છોડીને ચલાવવા જતાં હેન્ડલ પરનો કાબૂ ગુમાવ્યો હતો.

પહેલાં તો તેનું મોપેડ બ્રિજના ડિવાઈડર સાથે અથડાયું હતું, ત્યાંથી બ્રીજની પેરાપેટ વોલ સાથે અથડાઈને સીધું જ ૩૦ ફૂટ નીચે જમીન ઉપર પટકાયું હતું.મોપેડ સાથે ચાલક અને તેની પાછળ બેઠેલો યુવક પણ ઓવરબ્રિજની નીચે પટકાયા હતા. આ બંને યુવક ગંભીર રીતે ઈજાગ્રસ્ત થયા હતા અને માથાના ભાગે પણ ગંભીર ઈજાઓ પહોંચી હતી.

મોપેડની પાછળ બેઠેલા સાજિદ હુસૈન સૈયદનું તો ઘટનાસ્થળે જ મોત નીપજ્યું હતું, જ્યારે મોપેડ ચલાવતો હતો તે યુસુફ ઇમરાન શાહ ગંભીર રીતે ઈજાગ્રસ્ત થતાં તેને હોસ્પિટલમાં સારવાર માટે ખસેડવામાં આવ્યો હતો. હાલ તેની પણ સ્થિતિ ગંભીર હોવાનું જાણવા મળી રહ્યું છે.

મૃતક યુવકને પોસ્ટમોર્ટમ માટે ખસેડવામાં આવ્યો હતો.કતારગામ પોલીસે હાલ અકસ્માત મોતનો ગુનો દાખલ કરીને તપાસ હાથ ધરી છે. મૃતક કતારગામ વિસ્તારના સાબરીનગરમાં રહેતો હતો અને મૂળ બિહારનો વતની છે. તેના બનેવી સુરતમાં રહેતા હોવાથી અહીં આવ્યો હતો.

વતનમાં કામ ન હોવાને કારણે રોજગારી મેળવવા માટે ૭ દિવસ પહેલાં જ સુરત આવ્યો હતો. ઇજાગ્રસ્ત મોપેડ ચાલક ભાઠેના વિસ્તારનો રહેવાસી છે. રાત્રે વેડરોડથી ભાઠેના વિસ્તાર તરફ આવી રહ્યા હતા, એ વખતે આ ઘટના બની હતી. ઉત્તરાયણને કારણે ઓવરબ્રિજ પર વાહન ઓછા હતાં એટલે મોજ માટે ઝડપથી મોપેડ હંકારવા જતા કાળ ભેટી ગયો હતો.SS1MS