સ્થૂળતા ઘટાડવા ભારતીય બજારમાં દવા લોન્ચ કરી

નવી દિલ્હી, સ્થૂળતાથી પીડાતા ભારતીયો માટે સારા સમાચાર છે. અમેરિકાની દવા ઉત્પાદક એલી લિલી એન્ડ કંપનીએ ગુરુવારે (૨૦મી માર્ચ) ભારતમાં તેની વજન ઘટાડવાની દવા મૌંજરો લોન્ચ કરી છે. આ દવા પહેલાથી જ પશ્ચિમી દેશોમાં વ્યાપકપણે વેચાઈ રહી છે.

નોંધનીય છે કે, સ્થૂળતા અને તેનાથી સંબંધિત ટાઇપ-૨ ડાયાબિટીસ ભારતમાં એક મોટી સ્વાસ્થ્ય સમસ્યા બની ગઈ છે. આ દવા અઠવાડિયામાં એકવાર ઇન્જેક્શન તરીકે આપવાની છે.

૫ મિલિગ્રામ ડોઝની કિંમત ૪૩૭૫ રૂપિયા છે. આ ઉપરાંત ૨.૫ મિલિગ્રામ માટે ૩૫૦૦ રૂપિયા ખર્ચવા પડશે.મૌંજરોનું રાસાયણિક નામ ટિર્ઝેપેટાઇડ છે. ભારતના સેન્ટ્રલ મેડિસિન સ્ટાન્ડર્ડ કંટ્રોલ ઓર્ગેનાઇઝેશન એ ૧૬મી જૂન ૨૦૨૪ના રોજ આયાત અને વેચાણ માટે મંજૂરી આપી હતી. આ દવાએ ક્લિનિકલ ટ્રાયલ્સમાં વજન ઘટાડવાની અસરો દર્શાવી છે.

કંપનીના જણાવ્યાનુસાર, સંશોધનમાં ભાગ લેનારા પુખ્ત વયના લોકોએ ૭૨ અઠવાડિયા દરમિયાન આહાર અને કસરત સાથે ૫ મિલિગ્રામની માત્રા પર સરેરાશ ૨૧.૮ કિલો અને ઓછામાં ઓછી માત્રા પર ૧૫.૪ કિલો વજન ઘટાડ્યું છે.

મૌંજરો પહેલાથી જ અમેરિકા, બ્રિટેન અને યુરોપિયન બજારોમાં લોકપ્રિય બની ગયું છે. સીડીએસસીઓ તરફથી મંજૂરી મળ્યા પછી, ભારતીય દર્દીઓએ વ્યક્તિગત ઉપયોગ માટે આ દવા આયાત કરવાનું શરૂ કર્યું. ભારતમાં, ૨.૫ મિલિગ્રામ ડોઝના ચાર શોટના એક મહિનાના કોર્સનો ખર્ચ લગભગ ૧૪,૦૦૦ રૂપિયા છે, જ્યારે બ્રિટેનમાં ભારતીય ચલણમાં તેની કિંમત ૨૩,૦૦૦થી ૨૫,૦૦૦ રૂપિયાની વચ્ચે છે.

ઉલ્લેખનીય છે કે, ભારતમાં લગભગ ૧૦.૧ કરોડ લોકો ડાયાબિટીસથી પીડાય છે. આ પુખ્ત દર્દીઓમાંથી લગભગ અડધા દર્દીઓને અપૂરતી સારવાર મળી રહી છે. આ કારણે તેમનું બ્લડ સુગર નિયંત્રણ શ્રેષ્ઠ નથી.

સ્થૂળતા ૨૦૦થી વધુ સ્વાસ્થ્ય સમસ્યાઓ સાથે જોડાયેલી છે, જેમાં હાઈપરટેન્શન, ડિસ્લિપિડેમિયા, કોરોનરી હૃદય રોગ અને અવરોધક સ્લીપ એપનિયાનો સમાવેશ થાય છે. તે ડાયાબિટીસ માટે એક મુખ્ય જોખમ પરિબળ છે.SS1MS