મુખ્યમંત્રીએ સરદારધામ ખાતે UPSCમાં સફળ થયેલા પાટીદાર યુવાનોનું સન્માન કર્યું
અમદાવાદ, ૫ મે ૨૦૨૫: મુખ્યમંત્રી શ્રી ભૂપેન્દ્રભાઈ પટેલે અમદાવાદ સ્થિત સરદારધામ ખાતે UPSC (IAS/IPS) તેમજ GPSCની પરીક્ષામાં સફળ થયેલા પાટીદાર યુવાનોનું સન્માન કર્યું હતું. આ કાર્યક્રમમાં ઓલ ઇન્ડિયા સિવિલ સર્વિસીસ તેમજ ગુજરાત જાહેર વહીવટી સેવામાં પસંદગી પામેલા યુવાનો ઉપસ્થિત રહ્યા હતા.
સન્માન સમારોહમાં સરદારધામ સંસ્થાના દાતાશ્રીઓ અને સંસ્થા દ્વારા આપવામાં આવતી સ્કોલરશીપના માધ્યમથી સફળતા મેળવનાર વિદ્યાર્થીઓને પણ સન્માનિત કરવામાં આવ્યા હતા.
આ અવસરે મુખ્યમંત્રીશ્રીએ પોતાના ઉદ્બોધનમાં જણાવ્યું હતું કે, “માનનીય વડાપ્રધાન શ્રી નરેન્દ્રભાઈ મોદીના દિશાદર્શનમાં નવી ટેકનોલોજીની સાથે દરેક ક્ષેત્રમાં આત્મનિર્ભર બનીને ‘એક ભારત, શ્રેષ્ઠ ભારત’ના મંત્રને સાર્થક કરવાનો છે.” તેમણે યુવાઓના યોગદાન દ્વારા વિકસિત ગુજરાત થકી વિકસિત ભારતના નિર્માણ માટેનો વિશ્વાસ વ્યક્ત કર્યો હતો.
LIVE: માનનીય મુખ્યમંત્રી શ્રી ભૂપેન્દ્રભાઈ પટેલની પ્રેરક ઉપસ્થિતિમાં સરદારધામ ખાતે તાલીમ મેળવેલ UPSC (IAS/IPS) તેમજ GPSC પરીક્ષામાં સફળ થયેલ વિદ્યાર્થીઓનો સન્માન સમારોહ. https://t.co/9Oovec7C80
— CMO Gujarat (@CMOGuj) May 4, 2025
કાર્યક્રમમાં હાજર રહેલા પાટીદાર સમાજના અગ્રણીઓએ સરદારધામ દ્વારા યુવાનોના કૌશલ્ય વિકાસ માટે હાથ ધરવામાં આવતી વિવિધ પ્રવૃત્તિઓની પ્રશંસા કરી હતી. સરદારધામના પ્રમુખે જણાવ્યું હતું કે સંસ્થા યુવાનોને સરકારી સેવાઓ માટે તૈયાર કરવા ઉપરાંત ટેકનિકલ અને વ્યાવસાયિક શિક્ષણ પણ પૂરું પાડે છે.
આ અવસરે સન્માનિત થનાર યુવાનોએ તેમની સફળતાનો શ્રેય તેમના માતા-પિતા અને સરદારધામ સંસ્થાને આપ્યો હતો. સમારોહના અંતે મુખ્યમંત્રીશ્રીએ એવી આશા વ્યક્ત કરી હતી કે આ યુવાનો જાહેર વહીવટમાં પોતાનું યોગદાન આપીને ગુજરાત અને ભારતના વિકાસમાં મહત્વપૂર્ણ ભૂમિકા નિભાવશે.
