કાલોલ મામલતદાર કચેરીનો પટાવાળો લાંચ લેતા રંગે હાથ ઝડપાયો
(પ્રતિનિધિ)ગોધરા, પંચમહાલ એન્ટી કરપ્શન બ્યુરો (એ.સી.બી.) દ્વારા કાલોલ મામલતદાર કચેરીમાં યોજાયેલ ટ્રેપ ઓપરેશનમાં એક કરાર આધારિત પટાવાળાને લાંચ સ્વીકારતા રંગેહાથ પકડવામાં આવ્યો છે. નાની રકમ હોવા છતાં આ કાર્યવાહી સરકારી કચેરીઓમાં ચાલી રહેલી ભ્રષ્ટાચારની મનોદશા પર મોટો પ્રહાર ગણાય છે.
માહિતી અનુસાર, કાલોલ મામલતદાર કચેરીની રેકર્ડ શાખામાં પટાવાળા તરીકે ફરજ બજાવતા અશોકકુમાર હરિપ્રસાદ જોશીએ એક નાગરિક પાસે જમીન સંબંધિત દસ્તાવેજોની નકલો આપવા બદલ રૂ. ૪૦૦/- લાંચની માંગણી કરી હતી. નાગરિકે સીધી રીતે લાંચ આપવાને બદલે એ.સી.બી.નો ટોલ ફ્રી નંબર ૧૦૬૪ પર સંપર્ક કરી ફરીયાદ નોંધાવી હતી.
ફરીયાદને આધારે એ.સી.બી.એ પ્રાથમિક તપાસ હાથ ધરી હતી, જેમાં લાંચની માંગણી સાચી હોવાના પુરાવા મળ્યા બાદ ટ્રેપ ગોઠવવાનો નિર્ણય લેવાયો. આયોજન મુજબ, ફરીયાદીને લાંચની રકમ આપવા મોકલવામાં આવ્યો અને ગુપ્ત નિરીક્ષણ હેઠળ આખી કાર્યવાહી કરવામાં આવી.
ટ્રેપ દરમિયાન આરોપી અશોકકુમાર જોશીએ ફરિયાદી પાસેથી કોઈપણ પ્રકારની અધિકૃત પહોંચ આપ્યા વગર રૂ. ૪૦૦/-ની લાંચ સ્વીકારી લીધી. તે જ ક્ષણે છટકામાં તૈનાત એ.સી.બી.ની ટીમે તેને રંગેહાથ ઝડપી પાડ્યો. આરોપી પાસેથી મળેલી રૂ. ૪૦૦/-ની લાંચની રકમ કાયદેસરની કાર્યવાહી હેઠળ જપ્ત કરવામાં આવી છે.
આ ઓપરેશનમાં ટ્રેપીંગ અધિકારી એચ.પી. કરેણ (પોલીસ ઇન્સ્પેકટર, એ.સી.બી. પંચમહાલ યુનિટ, ગોધરા) અને તેમની ટીમે મહત્વપૂર્ણ ભૂમિકા ભજવી હતી. સમગ્ર કામગીરી પર સુપરવિઝન અધિકારી શ્રી બી.એમ. પટેલ (મદદનીશ નિયામક, એ.સી.બી., પંચમહાલ એકમ, ગોધરા)એ નજર રાખી હતી.
એ.સી.બી.ની ટીમે આરોપી વિરુદ્ધ લાંચ લેવાના ગંભીર ગુનાની કાયદેસરની કાર્યવાહી હાથ ધરી છે. પ્રાથમિક તપાસ બાદ આગળની કાર્યવાહી માટે કાયદેસર પગલાં લેવાશે.
નાની રકમની લાંચ હોવા છતાં આ કાર્યવાહી એ સાબિત કરે છે કે ભ્રષ્ટાચાર સામે એ.સી.બી. ‘ઝીરો ટોલરન્સ’ની નીતિ સાથે કામ કરી રહી છે. એ.સી.બી.એ નાગરિકોને પણ અપીલ કરી છે કે તેઓ કોઈપણ સરકારી કર્મચારી કે કર્મચારી સમાન કાર્ય કરતા લોકો લાંચ માંગે તો તરત જ ટોલ ફ્રી નંબર ૧૦૬૪ પર સંપર્ક કરે, જેથી ભ્રષ્ટાચારની પ્રવૃત્તિઓને અટકાવી શકાય.આ ઘટના ફરી એકવાર સ્પષ્ટ કરે છે કે સામાન્ય નાગરિકની સતર્કતા અને એ.સી.બી.ની ઝડપી કામગીરી ભ્રષ્ટાચાર સામેના સંઘર્ષમાં મહત્વપૂર્ણ સાબિત થઈ રહી છે.
