દેશમાં 92 હજારથી વધુ #Swadeshi4G ટાવરોનું લોકાર્પણ: ગુજરાતને 4000 નવા 4G ટાવરો મળશે
વડાપ્રધાન નરેન્દ્રભાઈ મોદીના હસ્તે દેશભરમાં 92 હજારથી વધુ સ્વદેશી 4G ટાવરોનું લોકાર્પણ: ગુજરાતમાં 4000 ટાવર કાર્યરત
ગાંધીનગર: વડાપ્રધાન નરેન્દ્રભાઈ મોદીએ BSNLના 25 વર્ષ પૂર્ણ થવાના ઐતિહાસિક અવસરે ઓરિસ્સા ખાતેથી સમગ્ર દેશમાં 92 હજારથી વધુ સ્વદેશી 4G ટાવરોનું વર્ચ્યુઅલ લોકાર્પણ કર્યું હતું. આ મેગા પ્રોજેક્ટ અંતર્ગત ગુજરાત રાજ્યને 4000 નવા 4G ટાવરોની ભેટ મળી છે, જે રાજ્યના સંચાર નેટવર્કમાં ક્રાંતિકારી પરિવર્તન લાવશે.
ગાંધીનગર ખાતે આયોજિત રાજ્યકક્ષાના વિશેષ સમારોહમાં મુખ્યમંત્રી શ્રી ભૂપેન્દ્રભાઈ પટેલ કેન્દ્રીય મંત્રી શ્રી મનસુખભાઈ માંડવીયા અને અન્ય મહાનુભાવોની સાથે ઉપસ્થિત રહ્યા હતા. આ સૌએ વર્ચ્યુઅલ માધ્યમથી વડાપ્રધાનશ્રીના કાર્યક્રમનું જીવંત પ્રસારણ નિહાળ્યું હતું. આ પહેલ ટેલિકોમ ક્ષેત્રે ભારતની આત્મનિર્ભરતાને વધુ વેગ આપનારી છે.
મુખ્યમંત્રીશ્રીએ BSNL ટીમને અભિનંદન પાઠવ્યા:
આ અવસરે મુખ્યમંત્રી શ્રી ભૂપેન્દ્રભાઈ પટેલે BSNLની સમગ્ર ટીમને અભિનંદન પાઠવતાં જણાવ્યું હતું કે, વડાપ્રધાન શ્રી નરેન્દ્રભાઈ મોદીના સક્ષમ નેતૃત્વ હેઠળ દેશમાં રોડ, રેલવે, ઈન્ફ્રાસ્ટ્રક્ચર અને સંચાર નેટવર્કમાં અનેક ક્રાંતિકારી પહેલો થઈ છે, જેના થકી ‘કનેક્ટિંગ ભારત’નો સંકલ્પ સાકાર થયો છે.
મુખ્યમંત્રીશ્રીએ ટેલિકોમ ક્ષેત્રે આવેલ વ્યાપક પરિવર્તન તેમજ ગુજરાતના ગ્રામીણ વિસ્તારોને મળનાર 4G સેવાના સીધા લાભો વિશે સૌને માહિતગાર કર્યા હતા. તેમણે ભારપૂર્વક જણાવ્યું હતું કે, આજનો આ કાર્યક્રમ ‘આત્મનિર્ભર ભારત’ની સંકલ્પનાને પરિપૂર્ણ કરવા માટે એક સીમાચિહ્નરૂપ ઘટના છે, કારણ કે આ ટાવરો સંપૂર્ણપણે સ્વદેશી ટેકનોલોજી પર આધારિત છે.
LIVE: માનનીય વડાપ્રધાન શ્રી નરેન્દ્રભાઈ મોદી દ્વારા BSNL ની સિલ્વર જ્યુબિલી અવસરે ઓરિસ્સા ખાતેથી સ્વદેશી 4G ટાવરોનું ઉદ્ઘાટન; ગાંધીનગર ખાતે રાજ્યકક્ષાનો કાર્યક્રમ. https://t.co/d1kvwqR9Ip
— CMO Gujarat (@CMOGuj) September 27, 2025
આત્મનિર્ભર ભારત અને વિકસિત ગુજરાત:
વધુમાં, મુખ્યમંત્રીશ્રીએ રાજ્યના નાગરિકોને સ્વદેશી ટેકનોલોજી અને ઉત્પાદનોના ઉપયોગ માટે અનુરોધ કર્યો હતો. તેમણે ‘વિકસિત ભારત માટે વિકસિત ગુજરાત’ના નિર્માણની પોતાની નેમ અને પ્રતિબદ્ધતા પણ વ્યક્ત કરી હતી. ગુજરાતમાં 4000 નવા સ્વદેશી 4G ટાવર કાર્યરત થવાથી ગ્રામીણ અને અંતરિયાળ વિસ્તારોમાં હાઈ-સ્પીડ ઈન્ટરનેટ કનેક્ટિવિટી પહોંચશે, જે ડિજિટલ ગુજરાતની ગતિને વધુ ઝડપી બનાવશે.
