ચંડોળાના અસરગ્રસ્તોને મકાન ફાળવણી ઝડપથી કરવા રજુઆત

 વિપક્ષના નેતા શહેઝાદખાન પઠાણે જણાવ્યું હતું કે ચંડોળા ખાતે 50 વર્ષથી વધુ સમયથી રહેતા ભારતીય ગરીબ લોકોના મકાનો તોડી નાખવામાં આવ્યા હતા. અમદાવાદ મ્યુનિસિપલ કોર્પોરેશન દ્વારા વર્ષ  2010ની પોલીસી મુજબ ચંડોળા ખાતે ભારતીય ગરીબ લોકોને વૈકલ્પિક વ્યવસ્થાના ભાગરૂપે EWS આવાસ યોજના હેઠળ આવાસો આપવાનું નક્કી કરવામાં આવ્યું હતું. મકાનો આપવા માટે અરજીઓ મંગાવવામાં આવી હતી

અને મકાનો તોડયાંને પાંચ માસથી વધુ સમય વીતી જવા છતાં હજુ સુધી તેઓને આવાસ ફાળવવામાં આવ્યા નથી. 2300 જેટલા નાગરિકો દ્વારા અરજી કરવામાં આવી છે પરંતુ હજી આ તમામ અરજીઓનું સમયસર નિકાલ કરવામાં આવ્યો નથી.

EWS આવાસ મેળવવા માટે AMC દ્વારા 10  હપ્તામાં કુલ ત્રણ લાખ ભરવા બાબતે અસરગ્રસ્ત લોકોને મ્યુ.કોર્પો. દ્વારા જણાવવામાં આવ્યું છે પરંતુ તેઓ અંત્યત ગરીબ પરિવારના લોકો છે. તેઓ દર માસે રૂ. 30000 ભરવા અસમર્થ છે.

તેઓ મજુરી કામ કરી રોજનું રોજ કમાઈને પરિવારનું ભરણપોષણ મહામુશ્કેલીથી કરે છે જેથી મજુરી કામ કરી રોજનું રોજ કમાઈને પરિવારનું ભરણપોષણ કરતાં લોકો માટે માનવતાના ધોરણે તેઓના હપ્તાની સમય મર્યાદા 10 માસથી વધારી કુલ 36 માસ કરી આપવામાં આવે તો તેઓ સરળતાથી હપ્તાની રકમ ભરી શકે અને દર માસે નાણાંકીય બોજો પણ ઓછો પડે જેથી પોતાના પરિવારનું ભરણપોષણ પણ સહેલાઇથી કરી શકે તેમ તેમણે વધુમાં જણાવ્યું હતું.