ઘરની તિજોરીના લોકરમાં છૂપાવેલા ૪ કિલો ગાંજા સાથે દંપતીની ધરપકડ

અમદાવાદ, ગોમતીપુર વિક્રમ મિલની ચાલીમાં ગાંજા સાથે દંપતી ઝડપાઈ ગયું છે. આ દંપતીએ ઘરમાં તિજોરીના લોકરમાં એક સ્કૂલ બેગ મૂકી હતી અને તેમાં ગાંજો છુપાવ્યો હતો.

આ જથ્થો સુરતના એક શખ્સ પાસેથી લીધો હોવાનું ખૂલતા તેની સામે પણ ગુનો નોંધાયો છે.ગોમતીપુર પોલીસના સર્વેલન્સ સ્કવોડના પીએસઆઈ કે.એમ. ચૌધરીએ બાતમીના આધારે આ દરોડો પાડ્યો હતો. રૂ.૪૨ હજારના ૪.૨૯૨ કિલો ગાંજા સાથે દંપતીની ધરપકડ થઇ છે.

ગોમતીપુરમાં આવેલી વિક્રમ મિલની ચાલીમાં રહેતા સૂરજ ઉર્ફે ટકલો દિવાકર (ઉં. ૨૯) અને સીમા સૂરજ દિવાકર (ઉં. ૨૬) ઘરેથી ગાંજાનો ગેરકાયદે ધંધો કરતા હોવાની બાતમી પોલીસને મળી હતી. તેના આધારે દરોડા પાડવામાં આવ્યો હતો. બેડરૂમમાં લોખંડની તિજોરીના લોકરમાં સ્કૂલ બેગ મળી હતી. તે ખોલતાની સાથે જ ગાંજાનો જથ્થો મળ્યો હતો. દંપતી સુરતથી આ ગાંજો વેચવા લાવ્યા હતા.

પ્લાસ્ટિકની ઝીપર બેગમાં ભરી ગાંજો વેચવામાં આવતો હતો.પૂર્વ અમદાવાદ અને તેમાંય ખાસ કરીને ગોમતીપુરમાં આવેલી કેટલીક ચાલીમાં આ જ પ્રકારે નશાની દુકાનો ધમધમી રહી છે. અનેક વખત લોકોએ સ્થાનિક પોલીસને રજૂઆત કરી છે છતાં પણ નશાના કાળા કારોબાર ચલાવનારા તત્ત્વો સામે કોઈ દાખલારૂપ કામગીરી કરવામાં આવી હોય તેવું જાણાયું નથી.SS1MS