મોડાસામાં કેટલીક સોસાયટીઓમાં ડોર ટુ ડોર ક્ચરો કલેક્શન નિયમિત કરવા રજૂઆત

મોડાસા નગરપાલિકાની બેઠકમાં પ્રમુખે યોગ્ય કરવા ખાતરી આપી

મોડાસા, મોડાસા નગરપાલિકાની સામાન્ય સભા પ્રમુખ નિરજભાઈ શેઠના અધ્યક્ષપદે પાલિકાના સભાગૃહમાં મળી હતી. જેમાં ઉપપ્રમુખ રોહીતભાઈ પટેલ અને વિપક્ષના કોંગી નેતા ગુલામહુસેન ખાલક તથા લાલાભાઈ જેથરા વાયરમેન સહિત ભાજપ અને વિરોધપક્ષના મોટાભાગના સભ્યો તેમજ ચીફ ઓફિસર સંજયભાઈ પંડ્યા ઉપસ્થિત હતા.

પાલિકાની સામાન્ય સભા સુમેળભર્યા શાંતિમય માહોલમાં યોજાઈ હતી. પ્રમુખ નિરજભાઈ શેઠે સભાનું સંચાલન કુનેહપૂર્વક કર્યું હતું. એકને બાદ કરતા તમામ ઠરાવો સર્વાનુમતે મંજૂર થયા હતા. આ સભામાં વિપક્ષ નેતા ગુલામહુસેન ખાલકએ પછાત મુલતાની વણઝારાના વસાહત રાણા સૈયદ વિસ્તારની બંધ સ્ટ્રીટ લાટના મુદ્દે રજૂઆત કરી વિજળીકરણથી વંચિત રાણા સૈયદ રહીશોને વિજળીનો લાભ આપવાની સાથે રાણા સૈયદ વિસ્તારમાં તળાવ નિર્માણ કરી રળિયામણું સ્થળ બનાવવા રજૂઆત કરી હતી

તેમજ ડુધરવાડા રોડ, ભેરૂન્ડા રોડ, કોલેજ રોડ અને પહાડપુર રોડ વિસ્તારની રહેણાંક સોસાયટીમાં ડોર ટુ ડોર ગંદા ક્ચરાનું કલેક્શન નિયમિત કરવા રજૂઆત કરી હતી ત્યારે પ્રમુખે યોગ્ય ઘટતુ કરવાની ખાત્રી આપી હતી. મોડાસા પાલિકાની સામાન્ય સભામાં નિરજભાઈ શેઠના અધ્યક્ષપણા હેઠળ જે મહત્ત્વના ઠરાવો થયા તેમાં વોર્ડ નં.૬માં કબ્રસ્તાન પાસેના જાહેર શૌચલય તોડી પાડી સ્પેશ્યલ ગ્રાન્ટમાંથી આંગણવાડી કેન્દ્રનું મકાન ઉભુ કરાશે

અને ટ્રાફિક સમસ્યા હલ કરવા અને ભારે ટ્રાફિકનું નિયમન કરવા નગરના હાર્દસમા ચાર રસ્તાના સર્કલ ખાતે ટ્રાફિક સિગ્નલ ઉભુ કરાશે તથા નગર સેવા સદન પાલિકા ક્ચેરી ખાતે મહાત્મા બાપુ ગાંધીજી અને ભારત માતાની એમ્બોઝ ઈમેજવાળી પ્રતિમા લગાવવાનો નિર્ણય કરાયો હતો. આ બંને એમ્બોઝ થ્રીડી ઈમેજ જેવી હશે જે પાલિકા સંકુલના બંને દરવાજા નજીક મુકવામાં આવશે.

આ સામાન્ય સભામાં અધ્યક્ષપદેથી નિરજભાઈ શેઠે જણાવ્યું હતું કે, ટ્રાફિકની સમસ્યા નિવારવા ચાર રસ્તા પર શહેરોની સિસ્ટમની જેમ ટ્રાફિક સિગ્નલ લગાવવામાં આવશે. જે માટે માર્ગ અને મકાન વિભાગ તથા પોલીસ તંત્ર સાથે સંકલનથી ઉચ્ચકક્ષાએથી મંજુરી મેળવ્યા બાદ સિગ્નલ લગાવાશે. સર્વાંગી વિકાસના તમામ કામોમાં સદસ્યોના સાથ-સહકાર માટે આભાર વ્યક્ત કર્યાે હતો.