સુત્રાપાડા પાસે ફળિયામાં રહેલી ત્રણ વર્ષની બાળકીનો દીપડાએ શિકાર કર્યો

વેરાવળ, ગીર સોમનાથ જિલ્લાના સુત્રાપાડા તાલુકાના મોરાસા ગામમાં માનવભક્ષી દીપડાએ ત્રણ વર્ષની બાળકીનો શિકાર કરતા અરેરાટી ફેલાઈ છે.

ગત રાતે ત્રણ વર્ષની બાળકી ઘરની બહાર હાથ ધોવા ગઈ ત્યારે દીપડો તેને ઉઠાવી ગયો હતો. આજે સવારે બાળકીના મૃતદેહના અવશેષો મળી આવ્યાં હતાં. આ ઘટનાને પગલે સમગ્ર પંથકમાં ભયનો માહોલ છે.

મળતી માહિતી મુજબ, મોરાસા ગામમાં ગત રાતે સાડા નવ વાગ્યે રમેશભાઈ પાલાભાઈ ચાવડાની ત્રણ વર્ષની દીકરી કુંદના ઘરની બહાર ફળિયામાં હાથ ધોવા ગઈ હતી. તે સમયે પરિવારના સભ્યો ઘરમાં જમી રહ્યા હતા. અચાનક જ દીપડો આવ્યો અને બાળકીને ઉઠાવીને લઈ ગયો હતો.

બાળકીના પિતા રમેશભાઈ ચાવડાએ જણાવ્યું હતું કે, ઘરમાં અમે ત્રણ જણા જમવા બેઠા હતા અને છોકરી બહાર હાથ ધોવા ગઇ હતી, ત્યારે અચાનક દીપડો આવ્યો અને તેને બોચીમાંથી પકડી લઇ ગયો. અમે તેને બચાવવા માટે દીપડા પાછળ દોડ્યા પણ હાથમાં કાંઈ આવ્યું નહીં.પછી દૂર ગયા તો ત્યાં મારી દિકરીના વસ્ત્રો મળ્યા હતાં. બાદ અમે રાત્રે સાડા અગિયાર વાગ્યે વન વિભાગને જાણ કરી હતી.

અમે આખી રાત શોધખોળ કર્યા બાદ આજે સવારે સાત વાગ્યે મૃતદેહ મળ્યો હતો.આ ઘટના પછી વન વિભાગે માનવભક્ષી દીપડાને પકડવા માટે કાર્યવાહી શરૂ કરી છે. વિસ્તારમાં પાંચ પાંજરાં ગોઠવવામાં આવ્યાં છે.

વન વિભાગ દ્વારા બાળકીના મૃતદેહના અવશેષોને પી.એમ અર્થે ખસેડી કાર્યવાહી હાથ ધરી છે.ગીર પંથકમાં દીપડા દ્વારા થતાં હુમલાઓની વધતી જતી ઘટનાથી લોકોમાં ફફડાટ ફેલાયો છે.ખેડૂતોને હાલમાં ખેતી કરવા આવનારા લોકો ખેતરમાં રહેવાથી ફફડી રહ્યા છે.SS1MS