લગ્ન પ્રસંગે ગરબા રમતા ધક્કો વાગતા યુવકે છરીથી હુમલો કર્યો

અમદાવાદ, અમરાઇવાડી વિસ્તારમાં લગ્ન પ્રસંગ હોવાથી ગરબાનું આયોજન કરવામાં આવ્યું હતું. ગઇ રાત્રે લોકો ગરબા રમી રહ્યાં હતાં ત્યારે એક યુવકથી બીજા યુવકને ધક્કો વાગી ગયો હતો. તેથી ઉશ્કેરાયેલા યુવકે ચાકુ વડે અન્ય યુવક પર હુમલો કરી લોહીલુહાણ કરી નાખ્યો હતો.

હુમલાખોર ત્યાંથી પલાયન થઇ ગયો હતો. લોહીલુહાણ હાલતમાં યુવકને એલજી હોસ્પિટલ લઇ જવામાં આવ્યો હતો. આ મામલે અમરાઇવાડી પોલીસે ફરિયાદ નોંધી છે. અમરાઇવાડીમાં ૨૨ વર્ષીય નરેશ પ્રભાકરભાઇ સુરવાડે પરિવાર સાથે રહે છે અને ખાનગી કંપનીમાં ડિલિવરી બોય તરીકે નોકરી કરે છે.

૨૪મીએ નરેશના પાડોશી અને તેમના સમાજના જ વિક્રમભાઇ દેવરામભાઇ સબકાડેની દીકરી પૂજાના લગ્ન પ્રસંગે પીઠીનો કાર્યક્રમ હતો. તે સમયે ત્યાં રાસ-ગરબાનું પણ આયોજન હતું. નરેશ ગરબા રમવા ગયો હતો. આ સમયે વિક્રમભાઇનો ભત્રીજો અનિકેત જ્ઞાનેશ્વર સબકાડે (રહે. અર્બુદાનગર, ઓઢવ) પણ ગરબા રમતો હતો.

ગરબા રમતા રમતા નરેશથી અનિકેતને ધક્કો વાગી ગયો હતો. તેથી તે ઉશ્કેરાઇ ગયો હતો અને ગાળો બોલવા લાગ્યો હતો. નરેશે માફી માગી ગાળો ન બોલવા જણાવ્યું હતું. જોકે, ગુસ્સે ભરાયેલા અનિકેતે ખિસ્સામાંથી ચાકુ કાઢી નરેશને મારી દીધું હતું. આ સમયે બીજા લોકો આવી ગયા હતા.

તેથી અનિકેત પલાયન થઇ ગયો હતો. લોહીલુહાણ હાલતમાં નરેશને એલજી હોસ્પિટલમાં લઇ જવાયો હતો. આ મામલે નરેશે અનિકેત સામે ફરિયાદ નોંધાવી છે.SS1MS