ઈ-વોલેટના નામે આવી રીતે 10 લાખ રૂપિયા ગુમાવ્યા યુવકે

ઓનલાઈન બમણા નફાની લાલચે યુવકે ગુમાવ્યા ૧૦ લાખ રૂપિયા-૮ હજારથી વધુ રૂપિયા ભરવાનું કહી યુવકને તોતિંગ નફો કરાવ્યો ઃ યુવકે બમણા નફાની લાલચે લાખો રૂપિયા ભર્યા

અમદાવાદ,  અત્યારે ડિજિટલ યુગમાં અવાર નવાર લોકો સાથે છેતરપિંડી થતી આવે છે. ત્યારે હવે સાયબર ફ્રોડ કરતી ટુકડીઓ પણ સતત વધી રહી છે. ઘરમાં કે ઓફિસમાં કાર્ય કરતા કરતા આવી ટીમ દુનિયાના કોઈપણ ખુણામાં રહેલી વ્યક્તિને લૂંટી નાખે છે. આવો જ એક કિસ્સો અમદાવાદમાં રહેતા યુવક સાથે બન્યો છે.

હાથીજણનો રહેવાસી યુવક ઓનલાઈન નોકરી કરી બમણો કરવાની લાલચે લૂંટાઈ ગયો હતો. ઠગોએ એકપછી એક કરીને લાખો રૂપિયા તેના વોલેટમાંથી પચાવી પાડ્યા હતા. જાણો કેવી રીતે આ લૂંટનું કૌભાંડ શરૂ થયું હતું.

નોંધનીય છે કે હાથીજણમાં યુવક વસવાટ કરતો હતો. જ્યાં તેની સાથે વ્હોટ્‌સએપના માધ્યમથી એક જૂથે મેસેજ કર્યો હતો. તેને કહેવામાં આવ્યું હતું કે એક કંપની તને ઓનલાઈન સર્વે કરવાના રૂપિયા આપશે. એના માટે તેણે વોલેટમાં ૮૦૦૦થી વધુ રૂપિયા ભરવા પડશે.

ત્યારપછી જાેતજાેતામાં તેની પાસે વોલેટમાં ૧૧ હજાર રૂપિયા પણ આવી ગયા હતા. યુવકને ત્યારપછી આ ઓનલાઈન કમાણીનો માર્ગ સરળ લાગ્યો હતો. જેને લઈને તેણે અવાર નવાર પોતાના એકાઉન્ટમાં રૂપિયા ભરાવાનું શરૂ કરી દીધું હતું. કંપની પણ તેને નવું કામ આપતી ગઈ અને ડિજિટલ વોલેટમાં રૂપિયા જમા કરાવતી ગઈ હતી.

જાેતજાેતામાં યુવકે કુલ ૧૧ લાખ રૂપિયા ડિપોઝિટ કરાવ્યા હતા. ત્યારે બીજી બાજુ જાેવા જઈએ તો તેને વળતા ૧૫ લાખ રૂપિયા વોલેટમાં મળતા તે ખુશ થઈ ગયો હતો.

યુવકે ત્યારપછી કંપની પાસેથી ૧૦ લાખ રૂપિયા પરત માગ્યા હતા. તેણે કહ્યું કે મારા વોલેટમાંથી તમે બેન્કમાં ટ્રાન્સફર કરી દો. આમ કહેતા જ કંપનીએ તેને ૭ લાખ રૂપિયાની પેનલ્ટી ભરવા માટે જણાવ્યું હતું. તો આની સાથે યુવકને જાણ થઈ કે ઓનલાઈન ડિજિટલ વોલેટના નામ છેતરપિંડી થઈ ગઈ છે. ત્યારપછી પોલીસ ફરિયાદ કરી વધુ કાર્યવાહી હાથ ધરી હતી.