અમદાવાદ રેલવે સ્ટેશન પર સુરક્ષા વ્યવસ્થા મજબૂત કરવામાં આવી

અમદાવાદ,  અમદાવાદ મંડળ પર રેલવે સુરક્ષા બળ (RPF) દ્વારા વિશેષ સુરક્ષા અભિયાન ચલાવવામાં આવી રહ્યું છે. આ અભિયાન અંતર્ગત રેલવે સુરક્ષા બળ (RPF), સરકારી રેલવે પોલીસ (GRP) અને અન્ય સહાયક વિભાગો સાથે સમન્વય સાધીને સુરક્ષાના વિશેષ પગલાં લેવામાં આવ્યા છે.

અમદાવાદ સ્ટેશનના તમામ પ્રવેશ અને નિકાસ બિંદુઓ પર સુરક્ષા કર્મચારીઓને તૈનાત કરવામાં આવ્યા છે. આ સ્થળો પર બેગેજ સ્કેનર અને હેન્ડ હેલ્ડ મેટલ ડિટેક્ટર (HHMD) દ્વારા મુસાફરોના સામાનની તપાસ કરવામાં આવી રહી છે, જેમાં શંકાસ્પદ વસ્તુઓ પર વિશેષ ધ્યાન આપવામાં આવી રહ્યું છે.

રેલવે સ્ટેશનની સુરક્ષા માટે ૨૪ કલાક સશસ્ત્ર ક્વિક રિસ્પોન્સ ટીમ (QRT) ની રચના કરવામાં આવી છે, જે કોઈપણ કટોકટીની સ્થિતિમાં તાત્કાલિક પ્રતિક્રિયા આપી શકે છે. સ્ટેશન અને આસપાસના પરિસરમાં RPF અને GRP દ્વારા નિયમિત ફ્લેગ માર્ચ પણ આયોજિત કરવામાં આવી રહી છે.

સુરક્ષા અધિકારીઓ HHMD અને ડોગ સ્ક્વોડની મદદથી તોડફોડ વિરોધી તપાસ પણ સક્રિયતાથી હાથ ધરી રહ્યા છે. સ્ટેશન પરિસરમાં શંકાસ્પદ વસ્તુઓ શોધવા માટે તાલીમબદ્ધ શ્વાન દળનો પણ નિયમિત ઉપયોગ કરવામાં આવી રહ્યો છે.

આ ઉપરાંત, અન્ય કાયદા અમલીકરણ એજન્સીઓ અને ગુપ્તચર એકમો સાથે સતત સમન્વય જાળવવામાં આવી રહ્યો છે, જેથી માહિતીનું આદાન-પ્રદાન સરળતાથી થઈ શકે અને કોઈપણ શંકાસ્પદ પ્રવૃત્તિ પર તાત્કાલિક કાર્યવાહી કરી શકાય.

સ્ટેશન પર સુરક્ષા વ્યવસ્થાને વધુ સુદૃઢ બનાવવા માટે આધુનિક ગેજેટ્સ અને ટેકનોલોજીનો પણ ઉપયોગ કરવામાં આવી રહ્યો છે. સમગ્ર સ્ટેશન પરિસરમાં સીસીટીવી કેમેરા દ્વારા ૨૪ કલાક દેખરેખ રાખવામાં આવી રહી છે અને કંટ્રોલ રૂમમાંથી દરેક ગતિવિધિ પર નજર રાખવામાં આવી રહી છે.

મુસાફરોની સુરક્ષા સુનિશ્ચિત કરવા માટે સુરક્ષા અને સંરક્ષા પ્રોટોકોલ અંગે નિયમિત જાહેરાતો પણ કરવામાં આવી રહી છે, જેમાં મુસાફરોને અજાણ્યા વ્યક્તિઓ પાસેથી ખાવાનું કે પીવાનું સ્વીકારવાથી બચવા અને શંકાસ્પદ વસ્તુઓ કે વ્યક્તિઓ અંગે સુરક્ષા કર્મચારીઓને તાત્કાલિક જાણ કરવા સૂચના આપવામાં આવે છે.

અમદાવાદ રેલવે મંડળના અધિકારીના જણાવ્યા અનુસાર, “અમારું મુખ્ય લક્ષ્ય મુસાફરોને સુરક્ષિત અને નિર્વિઘ્ન યાત્રા પૂરી પાડવાનું છે. અમે સુરક્ષા વ્યવસ્થાને વધુ મજબૂત બનાવવા માટે સતત પ્રયત્નશીલ છીએ અને આ દિશામાં જરૂરી તમામ પગલાં લઈ રહ્યા છીએ.”