આલિયા ભટ્ટે અવોર્ડ શોમાં ગણાવી પોતાની ખામીઓ

મુંબઈ, અભિનેત્રી આલિયા ભટ્ટને તાજેતરમાં જ ટાઈમ ૧૦૦ ઈમ્પેક્ટ અવોર્ડથી સન્માનિત કરવામાં આવી છે. આલિયા ભટ્ટ સિંગાપોરમાં આયોજિત ઈવેન્ટનો ભાગ બની હતી. આ દરમિયાન આલિયાએ અવોર્ડ સ્વીકાર્યા પછી જે સ્પીચ આપી તેણે સૌનું દિલ જીતી લીધું છે.

આલિયા ભટ્ટે સ્પીચ દરમિયાન પોતાની ખામીઓ ખૂબીઓ ગણાવી હતી. ગર્ભવતી આલિયા ભટ્ટે સ્પીચના અંતે કહ્યું કે, તે બોલી રહી હતી ત્યારે તેનું બાળક સતત તેને લાત મારી રહ્યું હતું.

આલિયાએ પોતાની સ્પીચમાં કહ્યું, “મને લાગે છે કે, ૧૦ વર્ષ પહેલા જ્યારે મેં કામ કરવાનું શરૂ કર્યું ત્યારે હું વિચારતી હતી કે એક દિવસ હું દુનિયા પર રાજ કરીશ. દરેક જગ્યાએ લોકો મને ઓળખશે, હું કોણ છું તે જાણશે, કેટલી ઉદ્યમી, ટેલેન્ટેડ અને ઈન્ટેલિજન્ટ છું તે જાણશે, હોંશિયાર અને સંપૂર્ણ છું તેની બધાને ખબર પડશે. હું પર્ફેક્ટ બનવા માગતી હતી અને ઈચ્છતી હતી કે આ વાત લોકોને પણ ખબર પડે.”

આલિયાએ સ્વીકાર્યું કે, તેને નથી ખબર કે આટલી સિદ્ધિઓ તેણે કઈ રીતે મેળવી છે. આલિયાનું કહેવું છે કે, તે અમુક બાબતોમાં સહેજ પણ સારી નથી તો અમુકમાં ખૂબ સારી છે. તેણે પોતાની ખામીઓ અને ખૂબીઓ વિશે વાત કરતાં કહ્યું- “આજે રાત્રે હું તમારા સૌની સાથે મારી ખૂબીઓની સાથે ખામીઓને વહેંચવા માગુ છું.

દાખલા તરીકે હું સ્પેલિંગ્સમાં બહુ ખરાબ છું પરંતુ મને ખબર છે કે જે લોકો અતિસંવેદનશીલ છે તેમની સાથે કઈ રીતે વાત કરવી જાેઈએ. મને ભૂગોળ નથી આવડતું, દિશા નથી સમજાતી. મારા જનરલ નોલેજ વિશે દુનિયા પણ કહે છે કે, બહુ ખરાબ છે પરંતુ મારું ઈમોશનલ ઈન્ટેલિજન્સ ખૂબ વધારે છે.

જેને મેળવવા માટે મેં ખૂબ મહેનત કરી છે. હું મારા વજન અને દેખાવને લઈને મારી જાત સાથે કડકાઈ દાખવું છું પરંતુ હું ક્યારેય ફ્રેન્ચ ફ્રાઈઝને ના નથી કહેતી.”

આલિયા ભટ્ટે પોતાની સ્પીચમાં પરિવારના સભ્યોનો આભાર માન્યો હતો અને શાંતિથી સાંભળવા માટે શ્રોતાગણનો પણ આભાર માન્યો હતો. આલિયાએ મમ્મી-પપ્પા સોની રાઝદાન-મહેશ ભટ્ટ, બહેન શાહીન તેમજ પતિ રણબીર કપૂરનો આભાર માન્યો હતો.

અંતે તેણે આવનારા બાળક વિશે વાત કરતાં કહ્યું, “છેલ્લે જ્યાં સુધી અસરની વાત છે ત્યાં સુધી મને લાગે છે કે હું જે રીતે શક્ય બનશે એ રીતે છાપ છોડવાનું ચાલુ રાખીશ.

પરંતુ આજે આ અવોર્ડ શોએ ખરેખર મારા પર અને મારા બાળક પર ઊંડી છાપ છોડી છે કારણકે મારું બાળક આખી સ્પીચ દરમિયાન મને લાત મારી રહ્યું હતું. આભાર.” આલિયાને અવોર્ડ મળતાં સાસુ નીતૂ કપૂરે અભિનંદન આપતાં લખ્યું, ‘ગર્વ છે.’ આલિયાએ જવાબમાં બેવાર સાસુને લવ યુ કહ્યું છે.SS1MS