AMCની અનોખી પહેલ: કચરાના સ્થળને બનાવ્યા આકર્ષક પેઇન્ટિંગવાળા સુંદર સ્થળો
અમદાવાદ, તા. ૨૨ એપ્રિલ, ૨૦૨૫ – અમદાવાદના નાગરિકોમાં સ્વચ્છતા અંગે જાગૃતિ લાવવા અને ખુલ્લામાં કચરો ફેંકવાની આદતને નિયંત્રિત કરવા માટે અમદાવાદ મ્યુનિસિપલ કોર્પોરેશન (એએમસી)એ એક નવતર પહેલ હાથ ધરી છે.
શહેરના વિવિધ વિસ્તારોમાં જે સ્થળો કચરાના ઢગલા માટે કુખ્યાત હતા, તે સ્થળોનું હવે સુંદર પેઇન્ટિંગ સાથે કાયાકલ્પ કરવામાં આવ્યું છે. આ પહેલનો મુખ્ય ઉદ્દેશ નાગરિકોમાં જાહેર સ્થળોની સ્વચ્છતા જાળવવા અંગે જાગૃતિ લાવવાનો છે.
મ્યુનિસિપલ કોર્પોરેશનના એક અધિકારીએ જણાવ્યું કે, “અમે નોંધ્યું છે કે લોકો સુંદર અને સ્વચ્છ જગ્યાઓ પર કચરો ફેંકવાનું ટાળે છે. આ વિચારને આગળ લઈ જતાં, અમે કચરા માટે કુખ્યાત સ્થળોને કલાત્મક પેઇન્ટિંગ દ્વારા આકર્ષક બનાવ્યા છે.”
આ અનોખી પહેલ અંતર્ગત, સ્થાનિક કલાકારોની મદદથી દીવાલો પર સામાજિક સંદેશા, પર્યાવરણ જાગૃતિ અને શહેરની સંસ્કૃતિને દર્શાવતા પેઇન્ટિંગ બનાવવામાં આવ્યા છે. આ પ્રયાસથી ન માત્ર શહેરનું સૌંદર્ય વધ્યું છે, પરંતુ લોકો હવે આવા સ્થળોએ કચરો ફેંકતા અચકાય છે.
આગામી દિવસોમાં શહેરના વધુ વિસ્તારોમાં આ પ્રકારના પરિવર્તન લાવવાની યોજના એએમસી દ્વારા બનાવવામાં આવી છે. મ્યુનિસિપલ કમિશનરે આ અભિયાનમાં નાગરિકોનો સહયોગ માંગ્યો છે અને જણાવ્યું છે કે સ્વચ્છ અમદાવાદ બનાવવાનું લક્ષ્ય સામૂહિક પ્રયાસો દ્વારા જ સફળ થઈ શકશે.
