૩૧ માર્ચ, ૨૦૨૬ પહેલા નક્સલવાદનો અંત આવશેઃ અમિત શાહ

રાયપુરના પોલીસ પરેડ ગ્રાઉન્ડમાં આયોજિત રાષ્ટ્રપતિ કલર એવોર્ડ સમારોહમાં કેન્દ્રીય ગૃહમંત્રી મુખ્ય અતિથિ તરીકે હાજર રહ્યા

રાયપુર, કેન્દ્રીય ગૃહમંત્રી અમિત શાહ શનિવારે છત્તીસગઢની ત્રણ દિવસની મુલાકાતે રાયપુર પહોંચ્યા હતા. રવિવારે અમિત શાહે રાયપુરના પોલીસ પરેડ ગ્રાઉન્ડમાં આયોજિત રાષ્ટ્રપતિ કલર એવોર્ડ સમારોહમાં મુખ્ય અતિથિ તરીકે હાજરી આપી હતી. આ દરમિયાન અમિત શાહે કહ્યું કે કેન્દ્ર અને છત્તીસગઢ સરકાર ૩૧ માર્ચ, ૨૦૨૬ પહેલા રાજ્યમાંથી નક્સલવાદના ખતરાને ખતમ કરવા માટે પ્રતિબદ્ધ છે.

કેન્દ્રીય ગૃહ પ્રધાન અમિત શાહે પોલીસ પરેડ ગ્રાઉન્ડ ખાતે રાષ્ટ્રપતિ કલર એવોર્ડ પ્રાપ્ત કરવા બદલ છત્તીસગઢ પોલીસને અભિનંદન પાઠવ્યા હતા. રાષ્ટ્રપતિ પોલીસ કલર એવોર્ડ સમારોહને સંબોધતા અમિત શાહે કહ્યું કે રાજ્યના નેતૃત્વ, મુખ્યમંત્રી, રાજ્યના ગૃહમંત્રીએ પ્રતિજ્ઞા લીધી છે અને ભારત સરકાર પણ તમારા સંકલ્પ માટે પ્રતિબદ્ધ છે.

અમિત શાહે વધુમાં કહ્યું કે, છત્તીસગઢ પોલીસે છેલ્લા એક વર્ષમાં નક્સલવાદ સામેની લડાઈમાં મહત્વની સિદ્ધિઓ મેળવી છે. અમિત શાહે વિશ્વાસ વ્યક્ત કર્યો કે છત્તીસગઢ પોલીસ તેની જવાબદારી નિભાવશે અને તેની ફરજમાંથી ક્યારેય પાછળ નહીં હટે. છત્તીસગઢ પોલીસે દેશના વિવિધ સુરક્ષા દળો સાથે મળીને છેલ્લા એક વર્ષમાં નક્સલવાદના તાબૂતમાં છેલ્લો ખીલો લગાવવાનું કામ કર્યું છે.

આ દરમિયાન અમિત શાહે છત્તીસગઢ સરકારની નક્સલવાદીઓ માટે પુનર્વસન નીતિની પણ પ્રશંસા કરી હતી. તેમણે નક્સલવાદીઓને હિંસા છોડીને મુખ્ય પ્રવાહમાં જોડાવા માટે પણ અપીલ કરી હતી. તેમણે કહ્યું, છત્તીસગઢ પોલીસે એક વર્ષમાં નક્સલવાદીઓને ખતમ કરવાનો બહાદુરીપૂર્વક સંકલ્પ કર્યો છે. શાહે નક્સલવાદીઓને અપીલ કરતા કહ્યું કે અમારી સરકારે ખૂબ સારી શરણાગતિ નીતિ બનાવી છે. મુખ્ય પ્રવાહમાં જોડાઓ. શસ્ત્રો છોડો. વિકાસના માર્ગ પર આવો.”

છત્તીસગઢ પોલીસે છેલ્લા એક વર્ષમાં નક્સલવાદ સામે મોટી લડાઈ લડી છે. છેલ્લા એક વર્ષમાં રાજ્યમાં ૨૮૭ નક્સલવાદીઓ માર્યા ગયા અને ૧૦૦૦ નક્સલવાદીઓની ધરપકડ કરવામાં આવી. આ સમયગાળા દરમિયાન ૮૩૭ નક્સલવાદીઓએ હિંસાનો માર્ગ છોડીને આત્મસમર્પણ કર્યું હતું. ચાર દાયકામાં પ્રથમ વખત નક્સલવાદી હિંસામાં નાગરિકો અને સુરક્ષા દળોના મોતનો આંકડો ૧૦૦થી નીચે ગયો છે.

શાહે કહ્યું કે વડાપ્રધાન નરેન્દ્ર મોદીના નેતૃત્વમાં ૧૦ વર્ષમાં સમગ્ર દેશમાં નક્સલવાદને કાબૂમાં લેવામાં આવ્યો છે. બસ્તર ઓલિમ્પિકના સમાપન સમારોહ પછી, અમિત શાહ ૦૪ઃ૪૫ વાગ્યે જગદલપુરમાં સર્કિટ હાઉસ પહોંચશે. અહીં કેન્દ્રીય ગૃહમંત્રી એવા નક્સલવાદીઓને મળશે કે જેઓ પોતાના હથિયાર છોડીને મુખ્ય પ્રવાહમાં સામેલ થઈ ગયા છે.

આ પહેલા કેન્દ્રીય ગૃહ અને સહકાર મંત્રી અમિત શાહ બપોરે ૨.૩૦ વાગ્યે બસ્તર પહોંચશે. બસ્તર ઓલિમ્પિકનો સમાપન સમારોહ જગદલપુરના ઈન્દિરા પ્રિયદર્શિની સ્પોટ્‌ર્સ ગ્રાઉન્ડ ખાતે યોજાઈ રહ્યો છે. આ કાર્યક્રમમાં અમિત શાહ મુખ્ય અતિથિ તરીકે હાજરી આપશે. આ દરમિયાન અમિત શાહ બસ્તરના ખેલાડીઓને ઈનામ આપ્યા બાદ તેમને મળશે. કેન્દ્રીય ગૃહમંત્રી બસ્તરના વિદ્યાર્થીઓને પણ મળવાના છે.