પંજાબને હરાવી બેંગલોરે ૧૮ વર્ષના ટાઇટલના દુકાળનો અંત આણ્યો

જોશ ઇંગ્લિસે પણ આક્રમક બેટિંગ કરી

ફાઇનલમાં રોયલ ચેલેન્જર્સ બેંગલોરનો છ રનથી વિજય, કોહલીના ૪૩, કૃણાલ પંડ્યા અને ભુવનેશ્વરનો બોલિંગમાં તરખાટ

અમદાવાદ,વિરાટ કોહલીના ૪૩ રન બાદ બોલર્સે કમાલ કરતાં રોયલ ચેલેન્જર્સ બેંગલોરે આખરે ઇન્ડિયન પ્રીમિયર લીગનું ટાઇટલ જીતવામાં સફળતા હાંસલ કરી હતી. મંગળવારે રમાયેલી આઇપીએલની ૨૦૨૫ની ટી૨૦ ક્રિકેટ ટુર્નામેન્ટની ફાઇનલમાં પંજાબ કિંગ્સના થોડા પ્રતિકારને બાદ કરતાં એક તરફી બની ગયેલી મેચમાં બેંગલોરનો છ રનથી વિજય થયો હતો. આ સાથે બેંગલોરે તેના ૧૮ વર્ષના આઇપીએલ ટાઇટલના દુકાળનો અંત આણ્યો હતો અને આઇપીએલ ટાઇટલ જીતી લીધું હતું. અહીંના નરેન્દ્ર મોદી સ્ટેડિયમ ખાતે રમાયેલી ફાઇનલમાં એક લાખ પ્રેક્ષકોની ઉપસ્તિતિમાં પ્રથમ બેટિંગ કરતાં રોયલ ચેલેન્જર્સ બેંગલોરે ૨૦ ઓવરમાં નવ વિકેટે ૧૯૦ રન નોંધાવ્યા હતા જેના જવાબમાં પંજાબ કિંગ્સે ૨૦ ઓવરમાં સાત વિકેટે ૧૮૪ રન કર્યા હતા.

૧૯૧ રનના ટારગેટ સામે રમતમાં બેંગલોરની ઇનિંગ્સનો પ્રારંભ ઝમકદાર રહ્યો હતો કેમ કે બે યુવાન અને પ્રતિભાશાળી બેટ્‌સમેન પ્રિયાંશ આર્યા અને પ્રભસિમરને પાંચ ઓવરમાં ૪૩ રન ફટકારી દીધા હતા. પાંચમી ઓવરના છેલ્લા બોલે ફિલ સોલ્ટે બાઉન્ડ્રી પર એક અફલાતુન કેચ ઝડપીને પ્રિયાંશને પેવેલિયનમાં મોકલી આપ્યો હતો. બોલ લગભગ સિક્સરમાં જ રૂપાંતરિત થનારો હતો પરંતુ અંગ્રેજ પ્લેયર સોલ્ટે બોલને ઉછાળીને મેદાનમાં પરત મોકલી દીધો હતો અને ત્યાર બાદ પરત ફરીને આસાન કેચ ઝડપી લીધો હતો.જોશ ઇંગ્લિસે પણ આક્રમક બેટિંગ કરી હતી. તેણે એક સમયે બેંગલોરની છાવણીમાં સોપો પાડી દીધો હતો. પ્રભસિમરન સાથે મળીને તેણે ઝંઝાવાતી ભાગીદારીનો પ્રારંભ કર્યાે હતો. આ તબક્કે રજત પાટીદારે મહત્વનો નિર્ણય લઈને કૃણાલ પંડ્યાને બોલિંગ આપી હતી જેણે તેના કેપ્ટનને નિરાશ કર્યાે ન હતો. કૃણાલે પ્રભસિમરન અને જોશ ઇંગ્લિસ બંનેની વિકેટ ખેરવી દીધી હતી.

પ્રભસિમરન ૨૨ બોલમાં બે સિક્સર સાથે ૨૬ અને ઇંગ્લિસ ૨૩ બોલમાં ચાર સિક્સર સાથે ૩૯ રન ફટકારીને આઉટ થયો હતો. બંનેને કૃણાલે આઉટ કર્યા હતા. તેણે તેની ચાર ઓવરમાં માત્ર ૧૭ રન આપીને બે વિકેટ લીધી હતી. કૃણાલની બોલિંગ બેંગલોર માટે અગત્યની પુરવાર થઈ હતી.૧૫મી ઓવર સુધીમાં ચાર મહત્વની વિકેટ પડી ગયા બાદ પંજાબની રનગતિ પર પણ બ્રેક વાગી ગઈ હતી. નેહલ વઢેરા અને શશાંક સિંઘમાં પ્રતિભા હતી પરંતુ હરીફ ટીમ અત્યાર સુધીમાં આક્રમક મિજાજમાં આવી ગઈ હતી. તેમને બોલર્સનો પણ સારો સપોર્ટ મળ્યો હતો.

અગાઉ પંજાબે ટોસ જીત્યા બાદ બેંગલોરને પ્રથમ બેટિંગ કરવાનું આમંત્રણ આપ્યું હતું. ફિલ સોલ્ટ આક્રમક મૂડમાં હતો પરંતુ જેમિસને તેની પહેલી અને ઇનિંગ્સની બીજી ઓવરમાં જ પેવેલિયન ભેગો કરી દીધો હતો. સોલ્ટે નવ બોલમાં ૧૬ રન ફટકાર્યા હતા. વિરાટ કોહલી તેની લયમાં હતો પરંતુ તે રનગતિ વધારી શકતો ન હતો. મયંક અગ્રવાલ સાથે મળીને તેણે ટીમનો સ્કોર ૫૬ સુધી પહોંચાડ્યો હતો. આ તબક્કે મૂળ કર્ણાટક માટે રમતો મયંક અગ્રવાલ ૧૮ બોલમાં ૨૪ રન ફટકારીને સ્પિનર યુઝવેન્દ્રસિંહ ચહલની બોલિંગમાં આઉટ થઈ ગયો હતો. રજત પાટીદાર અને લિયમ લિવિંગ્સ્ટને આ સમયે કોહલીની સાથે મહત્વપૂર્ણ ભાગીદારી નોંધાવીને ટીમનો સ્કોર આગળ ધપાવ્યો હતો.SS1