કેન્સરના ઈલાજની રસી શોધાઈ: રશિયામાં કેન્સરના દર્દીઓને મફતમાં આપવામાં આવશે
દુનિયા માટે રાહતઃ પ્રથમ રશિયાના નાગરિકોને મફતમાં કરાશે વિતરણ-રશિયાના સ્વાસ્થ્ય મંત્રાલયની જાહેરાત કેન્સરના ઈલાજની રસી શોધાઈ
મોસ્કો, આજે સમગ્ર વિશ્વના દેશો કેન્સર જેવી ગંભીર બીમારીથી પરેશાન છે ત્યારે આવી સ્થિતિમાં રશિયાએ એવો દાવો કર્યો છે જે સમગ્ર વિશ્વ માટે રાહતભર્યા સમાચાર માનવામાં આવી રહ્યા છે. રશિયાએ કહ્યું કે તેણે કેન્સરની વેક્સિન તૈયાર કરી લીધી છે જે તમામ નાગરિકોને મફતમાં ઉપલબ્ધ કરાવાશે.
રશિયન સ્વાસ્થ્ય મંત્રાલયે આ અંગે મોટી જાહેરાત કરી કે અમે કેન્સર સામે લડવા માટેની એક વેક્સિન વિકસાવી લીધી છે જે ૨૦૨૫ ની શરૂઆતથી રશિયામાં કેન્સરના દર્દીઓને મફતમાં આપવામાં આવશે. રશિયન મીડિયા અનુસાર રશિયન સ્વાસ્થ્ય મંત્રાલયના રેડિયોલોજી મેડિકલ રિસર્ચ સેન્ટરના જનરલ ડાયરેક્ટર એન્ડ્રે કેપ્રિને રશિયન રેડિયો ચેનલ પર આ વેક્સિન વિશે વિગતવાર માહિતી આપી હતી.
મોસ્કોમાં ગમાલેયા નેશનલ રિસર્ચ સેન્ટર ફોર એપિડેમિઓલોજી એન્ડ માઇક્રોબાયોલોજીના ડિરેક્ટર એલેક્ઝાન્ડર ગિન્ટ્સબર્ગે અગાઉ ?જણાવ્યું હતું કે આ વેક્સિન કોઈપણ પ્રકારના ટ્યુમરને ડેવલપ થતાં અટકાવી દે છે જેથી કેન્સરને ફેલાતા અટકે છે. દેખીતી રીતે આ વેક્સિનનો ઉપયોગ કેન્સરને રોકવા માટે સામાન્ય લોકોને આપવાને બદલે કેન્સરના દર્દીઓની સારવાર માટે કરવામાં આવશે.
આ વેક્સિન દરેક પ્રકારના કેન્સરના દર્દીને આપી શકાશે. રશિયન નેશનલ મેડિકલ રિસર્ચ રેડિયોલોજિકલ સેન્ટર અને ગમાલેયા નેશનલ રિસર્ચ સેન્ટર સહિત રશિયન આરોગ્ય મંત્રાલયે જાહેરાતની પુષ્ટિ કરી અને રસી કેવી રીતે કામ કરે છે તેની સ્પષ્ટતા કરી. હાલમાં તે અસ્પષ્ટ છે કે રસી કયા કેન્સરની સારવાર કરશે, તે કેટલી અસરકારક છે અથવા તો રસી શું કહેવાય છે.
તે વૈજ્ઞાનિક રીતે શક્ય છે કે કેન્સરને લક્ષ્ય બનાવવા માટે અમુક પ્રકારની રસી વિકસાવવામાં આવી શકે છે. અન્ય દેશો પણ હાલમાં સમાન વિકાસ પર કામ કરી રહ્યા છે. વર્ષ ૨૦૨૩માં યુ.કે સરકારે વ્યક્તિગત કેન્સર સારવાર વિકસાવવા માટે જર્મન બાયોટેકનોલોજી કંપની સાથે કરાર પર હસ્તાક્ષર કર્યા.
આ સિવાય ફાર્માસ્યુટિકલ કંપનીઓ મોડર્ના અને મર્ક એન્ડ કંપની હાલમાં ત્વચાના કેન્સરની રસી પર કામ કરી રહી છે. બજારમાં પહેલેથી જ એવી રસીઓ છે જેનો હેતુ કેન્સરને રોકવાનો છે, જેમ કે માનવ પેપિલોમાવાયરસ સામેની રસીઓ, જે સર્વાઇકલ કેન્સરને રોકવામાં મદદ કરે છે.
