સર્કિટ હાઉસથી મહાત્મા મંદિરને જોડતા રોડના બ્યુટિફિકેશન માટે રૂ.૬૫ કરોડ ખર્ચાશે

ગાંધીનગર મહાનગરપાલિકાનું ૧૪મું ડ્રાફ્ટ બજેટ રજૂ થયું

(એજન્સી)ગાંધીનગર, નાણાકીય વર્ષ ૨૦૨૫-૨૬ માટે ગાંધીનગર મહાનગરપાલિકાનું ૧૪મું ડ્રાફ્ટ બજેટ રજૂ થયું હતું. રૂ.૧૭૪૪ કરોડના આ બજેટમાં ઓલિમ્પિક અને વાઈબ્રન્ટ સમિટ દરમિયાન પાટનગરને વર્લ્ડક્લાસ સિટી બનાવવા પર વિશેષ ભાર મૂકવામાં આવ્યો છે. અમદાવાદ એરપોર્ટથી ચ-૦ સર્કલથી મહાત્મા મંદિર અને ગિફ્ટ સિટી સુધીના મુખ્ય માર્ગોને વિકસાવવા માટે રૂ.૫૦૦ કરોડથી વધુનું આયોજન કરવામાં આવ્યું છે. આગામી વર્ષના બજેટમાં નગરજનોના માથે મિલકત વેરા અને સફાઈ કરનું ભારણ વધારવાની દરખાસ્ત ડ્રાફ્ટ બજેટમાં કરાઈ છે.

મ્યુનિ. કમિશનર જે.એન. વાઘેલાએ ડ્રાફ્ટ બજેટ રજૂ કરતા જણાવ્યુ હતું કે, વાઈબ્રન્ટ સમિટ ૨૦૨૬ અને ઓલિમ્પિક ૨૦૩૬ની તૈયારીના ભાગરૂપે Âટ્‌વન સિટીના બદલે ટ્રાઈ સિટીનો અભિગમ રખાયો છે. ગાંધીનગરમાં આંતરરાષ્ટ્રીય કક્ષાની આંતરમાળખાકીય સુવિધા પર ખાસ ભાર રખાયો છે. ગાંધીનગરના ૮૦થી વાધારે તળાવો ફરતે પ્રોટેક્શન વોલ બનાવવા, તેને ઊંડા કરવા અને વિસ્તરણ કરવા માટે વિશેષ જોગવાઈ કરાઇ છે.

૭૫ જેટલા કુદરતી જળાશયો ફરતે ૬૦ હજારથી વધુ દેશી પ્રજાતિના વક્ષો રોપવામાં આવશે. આગામી વર્ષના બજેટમાંથી સૌથી વધુ ૪૫ ટકા ખર્ચ ભૌતિક આંતર માળખાકીય સુવિધા માટે કરવામાં આવશે. શિક્ષણ અને આરોગ્ય સેવાઓ માટે માત્ર ૩-૩ ટકા ખર્ચની જોગવાઈ રખાઈ છે. આંતરમાળખાકીય સુવિધઓમાં અમદાવાદ એરપોર્ટથી ચ-૦ સર્કલ, મહાત્મા મંદિર અને ગિફ્ટ સિટી સુધીના મુખ્ય માર્ગોને વર્લ્ડક્લાસ બનાવવા માટે રૂ.૫૦૦ કરોડથી વધુનું આયોજન કરાયું છે.

સર્કિટ હાઉસથી મહાત્મા મંદિરને જોડતા રોડ નંબર-૫ના બ્યુટિફિકેશન માટે રૂ.૬૫ કરોડ, ઈÂન્દરા બ્રિજથી કોબા સર્કલ સુધી એરપોર્ટ રોડની બંને બાજુ તથા તપોવન સર્કલથી હાઈ વે તરફ લેન્ડસ્કેપિંગ અને બ્યુટિફિકેશન માટે અંદાજે રૂ.૧૦૧ કરોડનો ખર્ચ કરવામાં આવશે. ચ-૦ સર્કલથી રક્ષાશક્તિ સર્કલ અને ધોળાકુવા જંક્શનથી પંચેશ્વર સર્કલ સુધી કુલ ૪.૫ કિમી લંબાઈના રોડ ફરતે સાઈકલ ટ્રેક, પાર્કિંગ સુવિધા અને સુશોભનની કામગીરી માટે રૂ.૧૦૩ કરોડનું આયોજન કરવામાં આવશે.

રક્ષાશક્તિ ફ્લાય ઓવર ચોકથી ગિફ્ટ સિટી બ્રિજ સુધીના ૨.૨ કિમી રોડના ડેવલપમેન્ટ માટે રૂ.૮૫ કરોડ, કોબાથી પંચેશ્વર સુધી ૮૦ મીટર રોડ પર સાઈકલ ટ્રેક, પાર્કિંગ સુવિધા અને સુશોભન માટે રૂ.૧૫૦ કરોડના ખર્ચે આયોજન કરવામાં આવશે.