યુપીમાં ઠંડીથી છેલ્લા ૩ દિવસમાં ૨૯ના મોત

જમ્મુ-કાશ્મીર અને હિમાચલમાં હિમવર્ષા; રાજસ્થાન-એમપીના ૩૫ શહેરોમાં તાપમાન ૧૦ડિગ્રી કરતા ઓછું

લખનઉ, જમ્મુ-કાશ્મીર અને હિમાચલ પ્રદેશમાં હિમવર્ષાને કારણે સમગ્ર ઉત્તર ભારતમાં તીવ્ર ઠંડી પડી રહી છે. બુધવારે હવામાન વિભાગે મધ્યપ્રદેશ, ઉત્તર પ્રદેશ, રાજસ્થાન સહિત ૯ રાજ્યોમાં કોલ્ડવેવ એલર્ટ જાહેર કર્યું છે.

ઉત્તર પ્રદેશમાં છેલ્લા ૩ દિવસમાં ઠંડીના કારણે ૨૯ લોકોના મોત થયા છે. છેલ્લા ૨૪ કલાકમાં ચાર લોકોના મોત થયા છે. ૧૬ જિલ્લામાં કોલ્ડવેવનું એલર્ટ છે. ૨ દિવસ બાદ અનેક જિલ્લાઓમાં વરસાદ અને કરા પણ પડી શકે છે.

મધ્યપ્રદેશ અને રાજસ્થાનના ૩૫ શહેરોમાં પણ તાપમાન ૧૦ ડિગ્રીથી નીચે નોંધાયું હતું. રાજસ્થાનના નાગૌરમાં તાપમાન ૨.૫ ડિગ્રીએ પહોંચી ગયું હતું.
દેશના ૧૭ રાજ્યોમાં ગાઢ ધુમ્મસ જોવા મળ્યું હતું. બુધવારે સવારે દિલ્હીમાં કેટલીક જગ્યાએ ઝીરો વિઝિબિલિટી નોંધાઈ હતી. જેના કારણે ઘણી ફ્‌લાઈટ્‌સ અને ટ્રેનો મોડી પડી હતી.

જમ્મુ-કાશ્મીરમાં હિમવર્ષાના કારણે રસ્તાઓ પર અનેક ફૂટ બરફ જામ્યો છે. શ્રીનગર-લેહ રોડ, મુગલ રોડ, સેમથાન-કિશ્તવાડ રોડ હિમવર્ષાને કારણે બંધ છે.
ઉત્તર પ્રદેશ, પંજાબ, હરિયાણા, દિલ્હી, હિમાચલ પ્રદેશ, બિહારમાં ગાઢ ધુમ્મસ રહેશે. ઉત્તર પ્રદેશમાં કોલ્ડવેવનું એલર્ટ. તાપમાનમાં ૨ ડિગ્રીનો ઘટાડો થઈ શકે છે. અરુણાચલ પ્રદેશ, મિઝોરમ, આસામ, મેઘાલય, નાગાલેન્ડ, મણિપુર અને ત્રિપુરામાં વીજળી પડવાનું એલર્ટ છે.

બિહાર, હિમાચલ, ઉત્તર પ્રદેશ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરામાં ગાઢ ધુમ્મસનું એલર્ટ છે. દક્ષિણ ભારતના કેટલાક રાજ્યોમાં વરસાદની શક્યતા છે. એમપી-રાજસ્થાન, પંજાબ, હરિયાણામાં કોલ્ડવેવનું એલર્ટ આપવામાં આવ્યું છે.

ઉત્તર દિશાના પવનને કારણે રાજસ્થાનમાં સવારે અને સાંજે ઠંડીનું જોર વધ્યું હતું. ગઈકાલે રાજ્યના ૨ શહેરો સિવાય લઘુત્તમ તાપમાન સિંગલ ડિજિટ એટલે કે ૧૦ ડિગ્રીથી નીચું નોંધાયું હતું.

છત્તીસગઢમાં પવનની દિશા બદલાવાને કારણે છેલ્લા બે-ત્રણ દિવસથી ઠંડીમાં સતત ઘટાડો થઈ રહ્યો છે. ત્યાં સુધી લઘુત્તમ તાપમાન સામાન્ય કરતા ઓછું હતું. તે ધીમે ધીમે સામાન્યની નજીક પહોંચ્યું હતું અને મંગળવારે સામાન્યથી ઉપર પહોંચ્યું હતું.

હરિયાણાના ૫ જિલ્લામાં બુધવારે સવારથી ધુમ્મસ છવાયું હતું. આ જિલ્લાઓમાં પલવલ, સોનીપત, પાણીપત, કરનાલ અને પંચકુલાનો સમાવેશ થાય છે. જો કે, જેમ જેમ દિવસ આગળ વધતો ગયો તેમ તેમ કેટલીક જગ્યાએ તડકો નીકળ્યો હતો. મોટાભાગના જિલ્લાઓમાં કોલ્ડવેવ ચાલી રહી છે. હવામાન વિભાગે ૩ દિવસ સુધી ઠંડીના ડબલ એટેકનું એલર્ટ જાહેર કર્યું છે.

હિમાચલ પ્રદેશના મેદાની વિસ્તારોમાં કોલ્ડવેવ અને ગાઢ ધુમ્મસ ત્રણ દિવસ સુધી લોકોને પરેશાન કરશે. હવામાન વિભાગએ ૪ જિલ્લા ઉના, હમીરપુર, બિલાસપુર, કાંગડા અને મંડીમાં ગાઢ ધુમ્મસ તેમજ કોલ્ડવેવ માટે યલો એલર્ટ જાહેર કર્યું છે.