વોટ માટે કોંગ્રેસ સનાતન ધર્મનો અંત લાવવા માગે છેઃ અમિત શાહ

(એજન્સી)ડુંગરપુર, તમિલનાડુના મુખ્યમંત્રી એમકે સ્ટાલિનના પુત્ર અને તમિલનાડુ સરકારના મંત્રી ઉદયનિધિ સ્ટાલિન દ્વારા સનાતન ધર્મ વિરુદ્ધ આપવામાં આવેલા નિવેદનને લઈને દેશમાં હોબાળો મચ્યો છે. ઉદયનિધિના નિવેદન પર શાસક પક્ષ, વિપક્ષ પર પ્રહારો કરી રહ્યું છે.

હવે કેન્દ્રીય ગૃહમંત્રી અમિત શાહે ઉદયનિધિના નિવેદન પર પહેલી પ્રતિક્રિયા આપી છે. અમિત શાહે વિપક્ષ પર પલટવાર કરતા કહ્યું કે, તમિલનાડુના મુખ્યમંત્રીનો પુત્ર સનાતન ધર્મના અપમાનની વાત કરે છે. આ લોકો તુષ્ટિકરણની રાજનીતિ કરે છે.

રાજસ્થાનના ડુંગરપુરમાં ભાજપની ‘પરિવર્તન સંકલ્પ યાત્રા’ શરૂ થઈ છે. આ કાર્યક્રમને સંબોધતા અમિત શાહે કહ્યું છે કે, છેલ્લા બે દિવસથી ભારતનું ગઠબંધન ‘સનાતન ધર્મ’નું અપમાન કરી રહ્યું છે. ડીએમકે અને કોંગ્રેસના નેતાઓ માત્ર વોટ બેંકની રાજનીતિ માટે ‘સનાતન ધર્મ’ને ખતમ કરવાની વાત કરી રહ્યા છે.

અમિત શાહે વધુમાં કહ્યું કે, આ પહેલીવાર નથી જ્યારે તેણે આપણા ‘સનાતન ધર્મ’નું અપમાન કર્યું હોય. અગાઉ મનમોહન સિંહે પણ કહ્યું હતું કે બજેટ પર લઘુમતીઓનો પ્રથમ અધિકાર છે, પરંતુ અમે કહીએ છીએ કે ગરીબો, આદિવાસીઓ, દલિતો અને પછાત લોકોનો પહેલો અધિકાર છે. આજે કોંગ્રેસ પાર્ટી કહે છે કે, જાે મોદીજી જીતશે તો સનાતન રાજ કરશે.

રાહુલ ગાંધીએ કહ્યું હતું કે હિંદુ સંગઠન, લશ્કર-એ-તૈયબા કરતાં પણ વધુ ખતરનાક છે. અમિત શાહે રાજસ્થાનના મુખ્યમંત્રી અશોક ગેહલોત પર પણ પ્રહારો કર્યા હતા. તેમણે કહ્યું કે હવે ગેહલોત સરકાર જવાનો સમય આવી ગયો છે. કેન્દ્રમાં ૧૦ વર્ષ સુધી યુપીએ સરકાર હતી. યુપીએ સરકારે રાજસ્થાનના લોકોને શું આપ્યું? બસ આનો હિસાબ આપો.