મહેસાણાના યુવક પાસેથી ૩.૨૫ લાખ પડાવી લેનાર ૫ાંચ સામે ગુનો

મહેસાણા, મહેસાણા તાલુકાના બલોલના યુવક સાથે દશ મહિના અગાઉ અમદાવાદની યુવતીનાં ફુલહાર કરી લગ્ન થયાં હતાં. લગ્નના વહેવાર પેટે નક્કી થયા મુજબ યુવકે રૂ.૩.૨૫ લાખ આપ્યા હતા. પરંતુ, લગ્ન બાદ ચાર દિવસ સાસરીમાં રહીને પિયર ગયેલી પરીણિતા અને તેની માતા રફુચક્કર થઈ ગયાં હતાં.

લગ્નના બહાને લાખોનો ચુનો ચોપડનાર પત્ની, સાસુ સહિત પાંચ સામે યુવકે છેતરપિંડીની ફરિયાદ નોંધાવી હતી.મહેસાણાના બલોલ ગામે બ્રાહ્મવાસમાં માતા અને ભાઈ સાથે રહેતા ૩૬ વર્ષિય મયુરકુમાર વિષ્ણુભાઈ પટેલ ઘરે જ સાડીનો વ્યવસાય કરે છે.

દશેક માસ અગાઉ મયુર પટેલે સમાજમાં યુવતી શોધવા મુળ પાટણ જિલ્લાના મણીયારીના વતની હાલ અમદાવાદના ખોખરા ચાચર ડેરીની સામે ઈમામ મુખીની ચાલીમાં રહેતા નટુભાઈ ગણેશદાસ પટેલને જવાબદારી સોંપતા તેઓએ અમદાવાદના દાસ્તાન સર્કલ નજીક સાત માળીયા ફલેટમાં પંચાલ સંજય ભીખાભાઈના મકાનમાં માતા જશીબેન સાથે રહેતી યુવતી સંગીતા રમેશભાઈ પટેલ સાથે રૂબરૂ મુલાકાત કરાવતાં યુવતી પસંદ આવી હતી.

ત્યાર બાદ યુવતી સંગીતા પટેલ, માતા જશીબેન પટેલ, વચોટિયા નટુભાઈ પટેલ, પંચાલ સંજય અને તેની પત્ની ડિમ્પલ પંચાલની હાજરીમાં નક્કી થયા મુજબ વહેવાર કરવા માટે રૂ.૩.૨૫ લાખ આપવાના હતા. દેવીનાપુરાના મંદિરમાં ફુલહાર કરી લગ્ન કર્યા બાદ બાકીનાં નાણાં પણ યુવતીના પક્ષવાળાને આપ્યાં હતાં.

લગ્ન બાદ સંગીતા બલોલમાં પતિ સાથે ચાર દિવસ રહ્યા બાદ પગફેરાના રીવાજ મુજબ પિયર ગઈ હતી. કેટલાક દિવસો બાદ મયુર પટેલ પોતાના ભાઈ સાથે સંગીતાને તેડવા અમદાવાદના ઉપરોક્ત સ્થળે પહોંચતાં ઘરે તાળું જોવા મળ્યું હતું.

ત્યારબાદ પત્ની, સાસુ સહિતના પાંચેય લોકોનો સંપર્ક ન થતાં લગ્નની લાલચે છેતરાયેલા યુવકે પત્ની સહિત પાંચેય સામે સાંથલ પોલીસ મથકે ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.SS1MS