દિલ્હી ૪૯ ડિગ્રી ગરમીમાં શેકાયું! બે દિવસ હીટવેવનું ઓરેન્જ એલર્ટ

કામ વગર લોકોને બહાર નહીં નીકળવા તંત્રની અપીલ

સોમવારે દિલ્હીની હવાની ગુણવત્તા દર્શાવતો આંક ૨૩૫ હતો જે ખરાબ શ્રેણીમાં હોવાનું સુચવે છે

નવી દિલ્હી, દિલ્હીમાં આ વર્ષે ગરમીએ માજા મૂકી છે અને સોમવારે દેશના પાટનગરમાં ગરમીનો પારો રેકોર્ડ ૪૯ ડિગ્રીએ પહોંચ્યો હતો. ગરમીનું પ્રમાણ અત્યંત વધ્યું હતું અને વાસ્તવિક ગરમીનું તાપમાન અથવા હીટ ઈન્ડેક્સ ૪૮.૯ ડિગ્રી સેલ્સિયસને સ્પર્શ્યાે હતો. ભારતીય હવામાન વિભાગ (આઇએમડી)એ આગામી બે દિવસ દિલ્હીમાં હીટવેટને લઈને ઓરેન્જ એલર્ટ જાહેર કર્યું છે. લોકોને કામ વગર બહાર નહીં નિકળવા તંત્રએ અપીલ કરી છે. દિલ્હીમાં સોમવારે મહત્તમ તાપમાન ૪૩.૪ ડિગ્રી સેલ્સિયસ નોંધાયું હતું જે સિઝનના સરેરાશ કરતા ૩.૪ ડિગ્રી વધુ હતું.

લઘુત્તમ તાપમાન ૨૭.૬ ડિગ્રી નોંધાયું હતું અને ભેજનું પ્રમાણ ૪૮થી ૨૫ ટકા વચ્ચે નોંધાયું હતું.આઇએમડીએ આગામી ત્રણ-ચાર દિવસ સુધી મહત્તમ તાપમાન ઊંચું રહેવાની આગાહી કરી છે. દિવસના સમયે તાપમાન ૪૪ ડિગ્રી આસપાસ જ્યારે રાત્રે ૨૮ ડિગ્રી સેલ્સિયસ રહેવાની સંભાવના છે. જમીની પવનોની ગતિ ૨૦-૩૦ કિ.મી. પ્રતિ કલાક રહેશે પરંતુ તેનાથી ગરમીમાં કોઈ ખાસ રાહત મળશે નહીં. ૧૨ જૂન પછી ચોમાસાની એન્ટ્રી થઈ શકે છે અને ત્યારબાદ દિલ્હીવાસીઓને ગરમીમાંથી રાહત મળશે તેમ હવામાન વિભાગે જણાવ્યું હતું.

હરિયાણા-ચંડિગઢ અને દિલ્હીના કેટલાક ભાગોમાં હીટવેવની સ્થિતિ થાળે પડી ગઈ છે. હિસાર, સિરસા, રોહતક અને આયાનગરમાં તાપમાન ૪૫ ડિગ્રી નોંધાયું હતું. સોમવારે દિલ્હીમાં સળંગ બીજા દિવસે હીટવેવની સ્થિતિ રહેતા વૃદ્ધો, બાળકો તથા હ્રદયની સમસ્યા ધરાવતા દર્દીઓમાં ગરમી સંલગ્ન તકલીફોના કેસમાં વધારો થયો હતો. સોમવારે દિલ્હીની હવાની ગુણવત્તા દર્શાવતો આંક ૨૩૫ હતો જે ખરાબ શ્રેણીમાં હોવાનું સુચવે છે. તબીબોએ ગરમીથી બચવા હળવા તથા કોટનના વસ્ત્રો પહેરવાની સલાહ આપી હતી. આ ઉપરાંત શરીરમાં પર્યાપ્ત પાણીનું સ્તર જળવાઈ રહે તે માટે લીબું પાણી અને પ્રવાહીનું સેવન કરવાની સલાહ આપી હતી.SS1