નશામાં ધૂત કોન્સ્ટેબલે ગાડીથી લોકોને કચડ્યા: 3 લોકોને ઈજા

રાણીપ વિસ્તારમાં બનેલો બનાવ: ત્રણ નાગરિકોને ઈજા

(એજન્સી)અમદાવાદ, હમણાં ઘણા સમયથી દરરોજ ખાખી પર સવાલો કરતી ઘટનાઓ સામે આવી રહી છે. વડોદરા, અમરેલી, અમદાવાદ સહિતના શહેરોમાં પોલીસકર્મીઓના કાંડ સામે આવી રહ્યા છે. ત્યારે ફરી એક વખત ખાખી પર ઘાડ લાગે તેવી ઘટના અમદાવાદથી સામે આવી છે.

રાણીપ વિસ્તારમાં બકરા મંડી નજીક એક પોલીસ કોન્સ્ટેબલે નશાની હાલતમાં વાહન ચલાવી અકસ્માત સર્જ્‌યો હોવાનો ચોંકાવનારો બનાવ સામે આવ્યો છે. આ ઘટનામાં પોલીસ કોન્સ્ટેબલ યુવરાજસિંહ વાઘેલા, જે માધુપુરા પોલીસ સ્ટેશનમાં ફરજ બજાવે છે, તેણે ગઈ રાત્રે નશામાં વાહન હંકારીને અકસ્માત સર્જ્‌યો હતો. આ પોલીસકર્મીએ નશાની હાલતમાં બે થી ત્રણ વાહનોને અડફેટે લીધા હતા, જેમાં એક લારી અને ટુ-વ્હીલરનો સમાવેશ થાય છે. આ અકસ્માત એટલો ગંભીર હતો કે, લારીમાં ટક્કર લાગતા જ નજીકના ઘરમાં ઘૂસી ગઈ હતી, જેના કારણે આસપાસના લોકોમાં ભયનો માહોલ સર્જાયો હતો.

આ ઘટનામાં ત્રણ વ્યક્તિઓને ઇજા પહોંચી હતી, જેમને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. સ્થાનિક લોકો અને પ્રત્યક્ષદર્શીઓએ જણાવ્યું કે, પોલીસ કોન્સ્ટેબલ નશાની હાલતમાં હોવાનું સ્પષ્ટ દેખાતું હતું, જેના કારણે તેણે વાહન પર નિયંત્રણ ગુમાવ્યું હતું. આ ઘટનાએ પોલીસ વિભાગની કામગીરી અને શિસ્ત પર પણ સવાલો ઉભા કર્યા છે.

એલ ડિવિઝન ટ્રાફિક પોલીસે આ મામલે તપાસ હાથ ધરી છે અને આરોપી કોન્સ્ટેબલ યુવરાજસિંહ વાઘેલા સામે કાર્યવાહી કરવાની તૈયારી શરૂ કરી છે. પોલીસે ઘટનાસ્થળેથી પુરાવા એકઠા કર્યા છે અને સાક્ષીઓના નિવેદનો નોંધી રહી છે.

આ ઘટનાએ શહેરમાં ચર્ચાનો વિષય બન્યો છે, અને લોકો પોલીસ વિભાગ પાસેથી કડક કાર્યવાહીની માંગ કરી રહ્યા છે. આવા બનાવો ટાળવા માટે ટ્રાફિક નિયમોનું કડક પાલન અને પોલીસકર્મીઓની જવાબદારી પર ભાર મૂકવાની જરૂર છે, જેથી ભવિષ્યમાં આવી ઘટનાઓ ન બને.