વાંછ, અસલાલી, કણભા ખાતેના ફટાકડાના 100થી વધારે યુનિટોમાં ચેકિંગ

ડીસા આગકાંડ ઘેરા પ્રત્યાઘાત પડ્યાં,

ગાંધીનગરઃ ઉનાળાની સીઝન શરૂ થાય એટલે આગ લાગવાના બનાવોમાં સતત વધારો થતો હોય છે, જેના કારણે ઘણી વખત લોકોના જીવ પણ જતા હોય છે. અમદાવાદ જિલ્લા પોલીસે 100થી વધુ ફટાકડાના ગોડાઉન-મેન્યુફેક્ચરિંગ યુનિટમાં સરપ્રાઇઝ ચેકિંગ કર્યું. અમદાવાદના છેવાડે આવેલ વાંછ ગામ ફટાકડાના ધંધા માટે મિની કાશી ગણવામાં આવે છે.

વાંછ ગામ અને એની આસપાસ ફટાકડા બનાવવાની કામગીરી વર્ષોથી ચાલી રહી છે. ગઇકાલે ડીસામાં ખેલાયેલા મોતના તાંડવ બાદ અમદાવાદ જિલ્લા પોલીસ હરકતમાં આવી ગઇ હતી.

ગઇકાલે વિવેકાનંદનગર પોલીસ, કણભા પોલીસ તેમજ અસલાલી પોલીસની ટીમ 100થી વધુ ફેક્ટરીઓમાં જઇને સરપ્રાઇઝ ચેકિંગ કર્યું હતું. આગ બાદ અમદાવાદ જિલ્લા એસીપી ઓમપ્રકાશ જાટના આદેશ બાદમાં પોલીસ હરકતમાં આવી હતી. જિલ્લા એલસીબી, લોકલ ક્રાઇમ બ્રાંચ સહિતની એક સ્પેશિયલ ટીમ બનાવી હતી અને સરપ્રાઇઝ ચેકિંગ હાથ ધર્યું હતું.

ડીસામાં બનેલા કાંડ બાદ અસલાલી, કણભા, વિવેકાનંદનગર પોલીસની ટીમે ફટાકડાની ફેક્ટરીઓમાં સર્ચ-ઓપરેશન હાથ ધર્યું હતું. અંદાજિત 100થી વધુ ગોડાઉનને ચેક કરવામાં આવ્યાં હતાં. દિવાળીના સમયે પણ પોલીસ દ્વારા લાઇસન્સ વગર ફટાકડાનો ધંધો કરતા લોકો વિરુદ્ધ ગુનો દાખલ કર્યો હતો. ગોડાઉનમાં ફાયર સેફ્ટીનાં સાધનો છે કે નહીં, ફટાકડા બનાવવાનું લાઇસન્સ છે કે નહીં જેવા અનેક મુદ્દાઓને લઇને પોલીસ દ્વારા સર્ચ કરાયું હતું.

ડીસા અગ્નિકાંડ થયો એ પહેલાં પણ પોલીસ અનેક વખત ચેકિંગ કરે છે. દર મહિને પોલીસ ગમે ત્યારે ફાટાકડાના ગોડાઉનમાં જઇને તપાસ કરતી હોય છે. પોલીસ જે ચેકિંગ કરે એનો એક રેકોર્ડ પણ બનાવવામાં આવે છે. દિવાળીના સમયે સંખ્યાબંધ ફટાકડાના વેપારીઓ વિરુદ્ધ કાર્યવાહી કરતા હોઇએ છીએ. આ સિવાય આગના સમયે ફાયર સેફ્ટીનાં સાધનોનો ઉપયોગ કેવી રીતે કરવો એનું પણ શિખવાડતા હોઇએ છીએ.

દરમિયાન ડીસામાં આગની ધટના બાદ અમદાવાદ ગ્રામ્ય પોલીસ એકશન મોડમાં આવી છે.  ફટાકડા વેચનાર અને ઉત્પાદન કરનાર 75 જેટલા લાઇસન્સ ધારકોને ત્યાં પોલીસ દ્વારા ચેકીંગ કરવામાં આવ્યું. અમદાવાદ ગ્રામ્ય SOG, LCB અને સ્થાનિક પોલીસ દ્વારા ફટાકડા વિક્રેતા પર સરપ્રાઈઝ ચેકિંગ હાથ ધરવામાં આવ્યું.

અસલાલીમાં આવેલા ફટાકડાના ગોડાઉનામાં પોલીસ દ્વારા ચેકિંગ હાથ ધરાયું હતું. મોટા ભાગના ગોડાઉનના માલિક લાઇસન્સધારક છે. ગ્રામ્ય પોલીસ દ્વારા ગત્ત દિવાળીના સમયમાં જ પાંચ જેટલા કેસ કરાયા હતા. વિવેકાનંદ નગર (વાંચ ગામ) 48, અસલાલી -13, કણભામાં 3, બોપલ અને ચાંગોદરમાં ફટાકડાના વિક્રેતા આવેલા છે.