અધિકારીઓ પાસેથી માહિતી એકઠી કરવા સાયબર ઠગોનો નવો પેંતરો

સરકારી ઈ-મેઈલ આઈડી બનાવી માગી વિગતોઃ આઈપીસીની વિવિધ કલમો હેઠળ અજાણ્યા શખ્સો સામે ગુનો નોંધાયો

(એજન્સી)અમદાવાદ, સાયબર ફ્રોડના કિસ્સાઓમાં પાછલા વર્ષોમાં વધારો થયો છે. લોકો સાથે ઓનલાઈને છેતરપિંડી કરીને તેમના બેંક અકાઉન્ટમાંથી લાખો રૂપિયા સેરવી લેવા સાયબર ઠગો જાતજાતના પેંતરા અજમાવતા રહે છે. ક્યારેક કોઈ અજાણી લિંક પર ક્લિક કરાવીને તો ક્યારેક સિમ કાર્ડ ક્લોન કરીને લોકોના બેંક અકાઉન્ટમાંથી રૂપિયા કાઢી લે છે.

આવા સાયબર ઠગ જલ્દી પોલીસના હાથમાં પણ ચડતા નથી. સામાન્ય લોકોથી માંડીને સેલિબ્રિટીઝ પણ સાયબર ફ્રોડનો શિકાર થયા હોય તેવી ઘટનાઓ સામે આવી ચૂકી છે. હાલમાં જ એક એવો કિસ્સો પ્રકાશમાં આવ્યો છે જ્યાં સાયબર ધૂતારાઓએ સરકારી અધિકારીઓ તરીકે ઓળખ આપીને અન્ય અધિકારીઓનો અંગત ડેટા હસ્તગત કર્યો હતો. નકલી ઈ-મેઈલ આઈડીનો ઉપયોગ કરીને સાયબર ધૂતારાઓએ આ ફ્રોડ કર્યો હતો.

સાયબર ક્રાઈમ પોલીસે અજાણ્યા શખ્સો સામે છેતરપિંડી તેમજ ઈન્ફર્મેશન ટેક્નોલોજી એક્ટની કલમો હેઠળ ફરિયાદ દાખલ કરી છે. કોન્સ્ટેબલ અશ્વિનકુમાર વીરજીએ પોતાની ફરિયાદમાં જણાવ્યું કે, પોલીસને બાતમી મળી હતી કે, એક શખ્સ ઈ-મેઈલ આઈડીનો ઉપયોગ કરીને અધિકારીઓ પાસેથી અંગત માહિતી લઈ રહ્યો છે.

ઈ-મેઈલના ટેક્નિકલ એનાલિસિસ પરથી જાણકારી મળી કે, આરોપીએ ડેટા રિટ્રીવ કરવાનો બિનસત્તાવાર એક્સેસ મેળવી લીધો હતો અને આ ડેટાનો ઉપયોગ બાદમાં તે નાણાંકીય ઠગાઈ કરવા માટે કરત તેવો અંદાજાે છે, તેમ ફરિયાદમાં જણાવાયું છે.

સાયબર ક્રાઈમના ઓફિસરોએ જણાવ્યું કે, આ ઈ-મેઈલ આઈડી પરથી મોકલાયેલા વિવિધ મેઈલની તેઓ વિગતો એકત્ર કરી રહ્યા છે. હાલ કેસની તપાસ ચાલી રહી હોવાથી ઓફિસરોએ વધુ માહિતી આપવાનો ઈનકાર કર્યો હતો.

આરોપીઓ સામે આઈપીસીની કલમો ૪૬૫ (બનાવટ), ૪૬૮ (બનાવટના ઈરાદાથી છેતરપિંડી) અને ૪૭૧ (બનાવટી દસ્તાવેજ કે ઈલેક્ટ્રીક રેકોર્ડને અસલી તરીકે દર્શાવીને રજૂ કરવો) હેઠળ ગુનો નોંધવામાં આવ્યો છે. સાથે જ ઈન્ફર્મેશન ટેક્નોલોજી એક્ટ હેઠળ પણ ગુનો નોંધવામાં આવ્યો છે.